“عايز تحرقني زي كهربا.. وتضيع عليا العروض اللي عندي.. مش كفاية قعدتني دكة وأنا متألق في الدوري عشان مصطفى شوبير.. مش هلعب مع عيال أنا.. وشوف حارس ليك”.. ده جزء من الخناقة اللي حصلت بين مدرب الأهلي مارسيل كولر وحارس الفريق محمود الزنفلي.
وعشان كدا استبعده من مباراة سموحة في الدوري.. لكن المفاجأة ليه حارس الأهلي تمرد على كولر؟.. وأيه علاقة الزمالك باللي حصل؟.. وإزي الخطيب انتصر لمبادئ الأهلي بقرار تاريخي؟.. ده اللي هنعرفه مع بعض في “قشة لفة بلس”.
الأهلي اتعاقد مع محمود الزنفلي حارس مرمى فريق الداخلية في الميركاتو الشتوي ومن وقتها اللاعب مفارقش دكة الاحتياطي.. لحد قبل نهاية الدوري اللي حسمه الأهلي بماتشات قليلة
لما كولر طلب من الحارس يجهز نفسه عشان يشارك في باقي مباريات الدوري وماتشات كاس مصر مع لعيبة من الشباب خصوصا أن كولر قرر يريح اللعيبة الأساسيين لكن المدير الفني اتصدم من رد الحارس.
مصادر في الأهلي قالت: “محمود الزنفلي حارس الأهلي كان عنده جلسة مع مارسيل كولر وطلب فيها السويسري من اللاعب تجهيز نفسه للمشاركة في المباريات المتبقية من بطولة الدوري قدام زد وإنبي ومودرن سبورت”.
كولر أكد للزنفلي أنه لو الأهلي محسمش الدوري قدام سموحة مش هيكون موجود قدام زد ومشاركته مش هتكون إلا بعد التتويج رسميًا بالدوري.. والزنفلي تحفظ على طلب كولر وقاله عايز يعرف مستقبله مع الفريق خصوصا أنه عنده عروض محلية وعايز يعرف مصيره مش بس كدة الزنفلي قال له كمان إزاي هلعب مع ناشئين.. وده ممكن يأثر في مستقبلي إني أستقبل أهداف كتير وبالتالي مافيش حد هيرضى يشتريني”.
الجلسة انتهت لحد كدا وكولر قاله هنبقي نرتبها.. الزنفلي بعدها بلغ خالد الجوادي مترجم كولر في حضور ميشيل يانكون أنه رافض يلعب مع الناشئين وأنه مش هيلعب غير مع الكبار عشان هو لاعب كبير وعنده أرقام كويسة وعلى أساسها الاهلي اتعاقد معاه.
مدرب الحراس والمترجم وصلوا رسالة الزنفلي لكولر اللي استدعى اللاعب بعد المران الأخير قبل مباراة سموحة وكان غضبان منه وقال: “أنت قُلت إنك مش هتلعب مع الناشئين لو حسمنا الدوري.. قاله آه قلت.. رد عليه وقاله تمام أنا مضطر أعتمد على مصطفى مخلوف اللي هيكون بديل لمصطفى شوبير في مباراة سموحة عشان نجهزه للمرحلة الجاية.. الزنفلي قال له معنديش مشكلة”.
الزنفلي قبل جلسة كولر الأخير استشف من اللاعبين اللي مش بيشاركوا بشكل أساسي مع الأهلي عن مشاركتهم بعد حسم الدوري.. والكل قاله: “احنا هناخد إجازة”.. وده اللي خلى الزنفلي يتمسك بموقفه وقال: “أنا مش هشيل الليلة لوحدي وأستقبل أهداف مع لعيبة عيال”.
كولر قال للزنفلي في نهاية الجلسة: “لو حابب تاخد إجازة تمام ممكن خلاص تاخد إجازة وتشوف مستقبلك”.
واللاعب رد عليه وقاله: “مفيش مشكلة وقدم ليه الشكر على الفترة اللي تواجد فيها مع الأهلي وإنه ارتبط اسمه بالنادي”.
محمود الزنفلي اكتشف إن اللعيبة عاملين جروب على الواتس وبيظبطوا عشان يروحوا يصيفوا في الساحل ويسبوه مع الناشئين.
الإعلامي كريم رمزي اتكلم عن الواقعة وقال: “محمود الزنفلي مش هيكون موجود مع الأهلي في الموسم الجديد، والحارس في مفاوضات مع نادي الزمالك اللي عايز يضمه في الميركاتو الصيفي”.
