أضخم صفقة في الدوري المصري هيعملها بيراميدز وهيكون فيها 4 لعيبة وهيدفعوا فيها فلوس بالدولار كمان.. وهتبقي حديث الشارع الكروي خصوصا أن ممدوح عيد خطف الصفقة من القطبين الأهلي والزمالك أصحاب أكبر شعبية في مصر.. وقدر مدير بيراميدز يحسم الصفقة قبل محمود الخطيب وحسين لبيب.
لكن المفاجأة في اللعيبة اللي عايزة تلعب للأهلي والزمالك بس بيراميدز خلصها من بدري.. أيه هي الصفقة الخيالية؟.. ومين هما اللعيبة اللي خطفها بيراميدز؟.. وليه الخطيب غضبان من اللي حصل؟.. ده اللي هنعرفه مع بعض في “قشة لفة بلس”.
ممدوح عيد المدير التنفيذي لفريق بيراميدز بعد تجديد الثقة فيه من مالك النادي رجل الأعمال الإماراتي سالم الشامسي وهو طايح في الصفقات وعايز يضيع على الأهلي والزمالك أي صفقة مهمة في الدوري المصري.
لكن أهم صفقة اتحسمت ووصفها محمد شيحة نائب رئيس الإسماعيلي السابق بـ”الصفقة الخيالية” وقال في تصريحات تلفزيونية على قناة “ام بي سي مصر”: “التسريبات من داخل مجلس إدارة النادي الإسماعيلي أن عبدالرحمن مجدي وعمر الساعي، لاعبا الفريق هيروحوا لنادي بيراميدز في فترة الانتقالات الصيفية الجارية”.
وفي المقابل الإسماعيلي هياخد مبلغ مالي بالدولار مش الجنيه وكمان 2 لعيبة هما إسلام عيسى ودودو الجباس نجوم بيراميدز ضمن الصفقة.. وكمان فيه تسريبات عن عودة أحمد فتحي عشان يعتزل في الإسماعيلي.
ومجلس إدارة الإسماعيلي معندوش مانع في بيع أي لاعب سواء عمر الساعي أو عبدالرحمن مجدي طالما هياخدوا مقابل مادي كبير يساعد المجلس في حل الأزمات المالية الموجودة في الوقت الحالي.
وحاليا بيتم التفاوض بين مسئولي بيراميدز والإسماعيلي على طريقة سداد الصفقة عشان الدراويش عايزين ياخدوا قيمة الصفقة دفعة واحدة قبل بداية الموسم.. عشان يلحقوا يحلوا مشكلة القيد ويجيبوا صفقات جديدة في أكتر من مركز.
مصادر قالت إن نادي بيراميدز حصل على توقيع عبدالرحمن عشان يكون أول صفقات الفريق السماوي في الصيف..
واللاعب وقع على العقود الخاصة بالتعاقد مع نادي بيراميدز في جلسة جمعته بمدير التعاقدات عمرو بسيوني.. وباقي خطوة واحدة قبل إتمام الاتفاق.. وهي حسم أمر المقابل المادي للصفقة خصوصا أن اللاعب اتفق على الراتب الشخصي اللي هياخده.
وعبدالرحمن هينتقل بصفة نهائية بعقد يمتد لـ3 مواسم.. بعد الاتفاق مع الإسماعيلي على دفع 600 ألف دولار.. لكن الدراويش طلبوا رفع المقابل المادي لـ900 ألف دولار وإضافة بعض الامتيازات الخاصة باللاعب.
وكمان عمر الساعي اللي المدير الفني للأهلي مارسيل كولر قال عايزه في الموسم الجاي لكن الإسماعيلي بيعمل مزاد عليه وعشان كدا المفاوضات تعطلت شوية لما لقيوا مطالب الدراويش مبالغ فيها خصوصا أنهم عايزين المبلغ كاش وميقلش عن 2 مليون دولار يعني قرابة 100 مليون جنيه.
وكمان الزمالك دخل في صفقة عمر الساعي وحصل على توقيعه، لكن إدارة بيراميدز راحت اتكلمت مع اللاعب وناديه.. فتراجع الزمالك عن ضم اللاعب.
وبكدا بيراميدز بينافس الأهلي على اللاعب وقدم عرض برقم خيالي ييجي 4 أضعاف العرض اللي قدمه الأهلي.. وبكدا هما الأقرب لحد دلوقتي للحصول على خدمات عمر الساعي… ومعاه عبدالرحمن مجدي اللي خلص مع بيراميدز كل حاجة.. وقريب هيعلنوا عن الصفقة.
إدارة الأهلي بتحاول تغري اللعيبة بفلوس إعلانات ومكافآت البطولات اللي يقدروا يحققوها عشان تقنعهم بالانتقال للقلعة الحمراء، لكن بيراميدز مجهزين الدولارات لأي صفقة جديدة.
الإعلامي محمد الليثي قال: “الأهلي عرض على الإسماعيلي 20 مليون جنيه وإعارة 3 لاعبين مقابل الحصول على خدمات عمر الساعي في انتقالات الصيف.. ومجلس الإسماعيلي تحفظ على المقابل المادي المعروض من الأهلي”.
