“غور بقي يا عم.. خلي عندك دم”.. ده هتاف جماهير الأهلي في المدرجات في ليلة حسم درع الدوري موسم 2023- 2024 ضد نجم الفريق الفولت العالي “كهربا”.
وبعدها اللاعب اختفى وعرفنا أنه دخل العناية المركزة وعلق محاليل.. وأمه عيطت عليه بعد اللي حصل ليه.
لكن أكتر حاجة أثرت في نفسيته هي اللي عمله معاه جمهور الأهلي واللي زعله أكتر هو شماتة جماهير الزمالك في اللاعب.. أيه اللي حصل لـ”كهربا”؟.. وكولر عمل معاه أيه؟.. وأيه القرار التاريخي اللي خده الخطيب؟.. وإزي نجم الزمالك دافع عنه؟.. ده اللي هنعرفه مع بعض في “عرب 22”.
كهربا من بعد انضمامه للنادي الأهلي في 13 ديسمبر 2019.. وهو لاعب مهم في الفريق وبيحظي بدعم جماهير كبير.. خصوصا أنه جاي من الزمالك وجمهور الأهلي دعم اللاعب في كل المشاكل اللي عملها سواء مع الإدارة أو مع زمايله أو مع جماهير القلعة البيضاء.
لكن في الأيام الأخيرة عمل خناقات مع المدير الفني السويسري مارسيل كولر اللي زهق منه وركنه على الدكة.. وطالب إنه يمشي وقال مش عايزه معايا.
لكن الإعلامي مهيب عبدالهادي المقرب من “كهربا” فجر مفاجأة وقال: “الفترة اللي فاتت كان في هجوم كبير جدا على كهربا من جماهير الأهلي، أنا استغربت إن جماهير الأهلي شتمت كهربا امبارح”
الناس بتقول إن كهربا، كان متغيب عن تدريبات الأهلي الأيام اللي فاتت.. كهربا، من 3 أيام كان في المستشفى واتعلقله محاليل وكانت حالته صعبة جدًا، وأرسل التقارير الطبية الخاصة به للنادي الأهلي.
امبارح بليل والدة كهربا.. تعبت ونقلوها للمستشفى.. أنا كنت مع كهربا امبارح ومع والدته وخالد بيبو مدير الكرة في الأهلي كان موجود.. أم كهربا.. كانت في العناية المركزة وبتبكي عليه
كهربا حالته النفسية صعبة جدًا.. وهو دلوقتي بيمر بظروف صعبة جدًا وضحى كتير عشان الأهلي.. اللاعب هيخرج إعارة لمدة موسم واحد.. لو جاله عرض خارجي يناسب طموحاته المادية.
لازم يطلع إعارة لمدة سنة.. الراجل مش معاه فلوس.. كل اللي معاه دفعهم في الغرامة بتاعت نادي الزمالك.. فيه تحامل واضح على كهربا.. المسئولين بيصدروا معلومات مش صح عن اللاعب.
وكهربا شارك في مران الأهلي تحت قيادة سامي قمصان المدرب المساعد لكولر.
مصادر قالت إن إدارة الأهلي عايزة تبيع كهربا في الخليح ومفيش عروض ليه لحد دلوقتي.. غير نادي زد اللي بيتفاوض مع اللاعب اللي عنده عرض من نادي بيراميدز ومنتظر يخلص نفسه من الأهلي.. لكن الخطيب طلب من خالد بيبو يحل أزمة كهربا ويراضوه عشان اللي عمله مع النادي.
وكيل كهربا، قال: “رحيل اللاعب أصبح قريب جدًا.. في ظل توتر العلاقة بينه وبين كولر.. واللاعب شعر باندهاش شديد من الهجوم الجماهيري اللي تعرض ليه في ملعب برج العرب أثناء مباراة سموحة.
كهربا اشتكى لزمايله من الهتافات خصوصا أن إعلام نادي الزمالك استغل الواقعة للسخرية منه والهجوم عليه.. وقالهم عايزين يضيعوني زي محمود علاء.
الإعلامي المقرب من مجلس الأهلي محمد الليثي انتقد كولر بسبب قسوته في التعامل مع كهربا وأفشة، وقال: “كهربا صعب عليا أوي.. وكولر بيضغط عليه جامد وبينزله 7 أو 10 دقائق ومطلوب منه يعمل حاجة”.
كولر ضاغط على كهربا وأفشة.. لما تضغط على اللعيب زيادة عن اللزوم بنفقده، كهربا في وقت من الأوقات كان الورقة الرابحة للنادي الأهلي هو الوحيد اللي بيسجل ويصنع.. ورجع بعد 6 شهور إيقاف مبيلعبش كورة.. أول مباراة قصاد سموحة سجل هدفين.
كهربا غلط واتعاقب لما مرضيش يتمرن.. ومحدش وقف جنبه من اللعيبة وأنا مش بقول حد يقف جنب الغلط.. بس المدرب مينفعش يقسو عليه.
