هغلب الأهلي في السوبر الأفريقي صورة كولر وجوميز وفي الخلفية الأهلي والزمالك
“محدش يعرف ينافس الأهلي.. بس أنا هكسب”.. مدرب الزمالك يجهز مفاجأة للأهلي في كاس السوبر الأفريقي.. إزي جوميز عرف نقطة ضعف كولر؟
“محدش يعرف ينافس كولر والأهلي.. عنده فريق قوي.. ومعاه لاعبين عظماء.. ودي حقيقة محدش يقدر ينكرها.. أي 11 لاعب بينزلوا الملعب بتلاقيهم بنفس الكفاءة.. لكن أنا عارف هكسبهم إزي في السوبر الأفريقي.
وعارف نقط ضعف المنافس.. وهلعب عليها”.. ده اللي قاله المدرب البرتغالي جوزيه جوميز عن طريقة مواجهة الأهلي في بطولة كأس السوبر الأفريقي اللي هيتلعب في السعودية.. إزي الزمالك هيفوز على الأهلي في السوبر.
وأيه هي نقطة ضعف كولر؟.. ومين اللعيبة اللي هيعتمد عليهم جوميز في البطولة؟.. ده اللي هنعرفه مع بعض في “قشة لفة بلس”.
قمة الأهلي والزمالك في السوبر الأفريقي هي التحدي اللي قدام كولر وجوميز وكل واحد جهز أسلحته كويس عشان يكسبه.. لكن المدرب البرتغالي اتكلم عن مشوار كولر مع الأهلي اللي قدر يكسب بطولات موسم 2023-2024.
وقال في تصريحات مع قناة أون تايم سبورتس: “الأهلي بيمتلك ميزة ذهبية في صفوفه تتمثل في الأداء الجماعي للفريق.. وطريقة لعب القلعة الحمراء مش بتعتمد على لاعب واحد فقط.. لكن فيه أسلوب جماعي.. وبيمتلك عناصر مميزة في قائمته وعشان كدا هو منافس قوي وشرس”.
“الأهلي عنده عناصره مميزة في صفوفه تقدر تغلق المساحات على المنافس.. ومن ثم التوجه نحو منطقة جزاء الخصم لتهديد مرماه لكن بشكل عام.. الأهلي عنده عناصر لديهم قوة فنية كبيرة.. وأرفض تحديد اسم لاعب واحد فقط في الأهلي ليكون هو الأفضل.. لكن الأمر الملفت للانتباه هو حصد وسام أبو علي لقب هداف الدوري المصري رغم مشاركته في عدد مباريات أقل”.
جوميز قال: “هنسعى لغلق المساحات قدام الأهلي.. وهدفنا الفوز في لقاء السوبر الأفريقي.. اللقاء صعب للغاية وهنسعى لتحقيق الفوز.. وهدفنا هيكون غلق المساحات قدام قوة عناصر القلعة الحمراء.. وعندنا إمكانيات كبيرة بالفريق تستطيع التعامل مع اللقاء”.
فريق الأهلي مش بيتواجد كتير قدام منطقة جزاء المنافس وبيستغلوا قوة لاعبيهم وسرعتهم وكل مرة يذهبون لمنطقة الجزاء يشكلوا الخطورة.. إحنا في الزمالك بنلعب بدفاع أكثر تقدما بعيدا عن مرمانا ونستغل المساحات إن أتيحت لنا.. ولكن أمام الأهلي مش من السهل خلق المساحات بل عليك التحلي بالصبر لكي يتحركوا..
الأهلي فريق متماسك وقوي وهذه نقطة قوته الرئيسية.. شوفت معظم مبارياتهم ومفيش لاعب أقول إنه الحل لهم.. كل اللاعب في الزمالك بيحبوا يسجلوا أهداف.. مصطفى شلبي يسجل وأحمد سيد زيزو يمكنه أن يسجل أكثر.. وبحب أشوف لاعبي الوسط أكثر انخراطا أمام المرمى.
جوميز اتكلم عن الزمالك وقال “لما يكون في فريقنا لاعبين يمكنهم التمرير مش هنقلق… عبدالله السعيد تم تقديمه ليا باعتباره صانع ألعاب.. ولكني شايف تصرفاته أقرب للاعب الوسط رقم 8.. رؤيته مذهلة وسرعته في اتخاذ القرارات عظيمة.. وبعض اللاعبين يحاولون إيجاد الحل الأفضل بعد تسلم الكرة بينما عبدالله يرى بشكل مسبق قبل أن يتسلم”.
الأهلي هيقابل الزمالك بصفته بطل دوري أبطال أفريقيا.. والزمالك بطل كأس الكونفدرالية.. وهيلعب الماتش يوم 27 سبتمبر في العاصمة السعودية الرياض.. ضمن موسم الرياض وده حسب البيان اللي أعلنه المستشار تركي آل الشيخ رئيس هيئة الترفيه السعودية اللي قال إنه اتفق رسميا مع رئيس الاتحاد الإفريقي لكرة القدم باتريس موتسيبي على استضافة النهائي التاريخي لكأس السوبر الأفريقي 2024 بين الأهلي والزمالك في موسم الرياض.
وجماهير الزمالك عندها تخوف من لعب الأهلي والزمالك السوبر في السعودية وشايفين تركي آل الشيخ بيجامل الأهلي على حساب الزمالك زي ما حصل في نهائي كاس مصر 2023 اللي فاز فيه الأهلي.
