“عندهم مشكلة نفسية وبيخافوا من الأهلي”.. تقرير سري يفضح لاعبي الزمالك قبل السوبر الأفريقي.. وحسين لبيب يلجأ لطبيب نفسي
“عندهم مشكلة نفسية.. وبيشوفوا الفانلة الحمراء بيخافوا”.. تقرير سري يفضح لاعبي الزمالك قبل مواجهة الأهلي السوبر الأفريقي.. وحسين لبيب يلجأ لطبيب نفسي
“بقي عندهم مشكلة نفسية.. وبيشوفوا الفانلة الحمراء بيخافوا.. لعيبة الزمالك بتفقد 50% من قوتها أول ما بتنزل قدام الأهلي.. اللي ديما بيعتمد على الثقة.. وإحنا بنخاف من الأهلي لما بيكون في حالة وحشة ويقابل الزمالك.. عملوا للعيبة عقدة”.. ده جزء من كلام اتنين من أهم كباتن الزمالك والأهلي.. مش بس ده كمان مدرب الزمالك فجر مفاجأة عن حالة لعيبة الزمالك.. أيه الحكاية؟.. وأيه التقرير السري اللي كشف اللي بيحصل في الزمالك؟.. وليه الكابتن حسين لبيب لجأ لطبيب نفسي عشان يجهز لعيبته قبل السوبر الإفريقي؟.. ده اللي هنعرفه مع بعض في “عرب 22”.
مباراة القمة بتعتبر بطولة خاصة للجماهير.. وكل النقاد والمحليين الرياضيين بيقولوا إن قمة الأهلي والزمالك ملهاش حسابات والفريق اللي بيكون جاهز نفسيا وعنده الدوافع بيقدر يكسب بعيد عن المستوى الفني للعيبة.. لكن تاريخ مواجهات الفريقين بتقول غير كدا.. وعشان كدا المدرب البرتغالي جهز تقرير سري عن لاعبي الزمالك قبل مواجهة الأهلي في بطولة كأس السوبر الأفريقي اللي هيتلعب في السعودية يوم 27 سبتمبر.
وانتقد لعيبة الزمالك اللي قال عليهم أنهم احتفلوا أكتر من اللازم لما فاز على الأهلي في الدوري المصري وعشان كدا اتعادلوا في بطولة الكونفدرالية.
ودي مش أول مرة حد يتكلم عن لعيبة الزمالك وحالته النفسية.. فمثلا خالد الغندور كابتن نادي الزمالك قال: “الأهلي متفوق نفسيًا على الزمالك.. في أخر 4 مباريات حقق الأهلي الفوز على الزمالك بنتائج كبيرة.. حتى في مباراة نهائي الكأس.. الأهلي كان مستواه وحش وقدر يفوز بنتيجة 2 -0 وقبلها كسب 3-0 و4-1 و5-3”.
النتائج دي تدل على أن المدربين اللي كانوا بيدربوا الزمالك بيلعبوا بطريقة غلط وبيفتحوا الملعب.. وعلى مدار الـ3 سنين اللي فاتت الأهلي لعب قدام الزمالك وهو غايب عن صفوفه 3 لاعبين أساسيين ورغم كدا بيفوز.. الأهلي عنده لاعبين مميزين وعندهم دوافع.. في كرة القدم مفيش فوارق كبيرة بين اللاعبين.. لكن الأهم هي الروح والدوافع.. وده اللي بيميز لاعبي الأهلي.
خالد الغندور قال: “لعيبة الزمالك عندها مشكلة نفسية مع الأهلي.. زي الأهلي لما بيواجه فريق صن داونز في بطولة دوري أبطال أفريقيا.. تحس أن اللاعبين عندهم حاجز نفسي في مباراة صن داونز.. خصوصا في المباريات اللي بتتلعب في جنوب أفريقيا.. نفس الحاجز النفسي موجود عند لاعبي الزمالك.. معندهمش ثقة الفوز.. لدرجة جعلت بعض من جمهور الزمالك يرتضي بالتعادل”.
مجدي عبدالغني نجم الأهلي السابق اتكلم عن النقطة دي وقال: “الزمالك لما بيواجه الأهلي بيفقد 50% من قوته.. بيشوفوا الفانلة الحمراء بيخافوا”.
وعشان تحل المشكلة إدارة القلعة البيضاء برئاسة الكابتن حسين لبيب قرروا أنهم يضموا طبيب نفسي يكون في جهاز المدرب البرتغالي جوزيه جوميز عشان يأهل اللعيبة في المباريات الكبيرة خصوصا بعد الأداء السيئ والخروج من موسم صفري وآخره بطولة كاس مصر اللي اتهزم فيها الزمالك من الطلائع.
الأهلي متفوق على الزمالك في عدد المباريات اللي جمعت بين الفريقين واللي بلغت 249 مباراة قمة رسمية وودية في كل البطولات.. النادي الأهلي فاز بـ109 ماتشات ونادي الزمالك فاز في 60 مباراة وخلصت 80 مباراة بالتعادل بين الفريقين.
