“أخد عقدي بالكامل أو أمشي”.. خلاف حاد بين علي معلول والأهلي على الطلب المثير.. ونجم الأهلي: عايز زي معلول
طلب معلول يقلق الخطيب ونجم الأهلي عايز زي علي معلول.. خلاف حاد يثير المخاوف في القلعة الحمراء.. وليه نجم تونس طالب بالرحيل؟
أنا مستحقش اللي بيحصل معايا.. نسيتوا تاريخي؟.. هاخد عقدي بالكامل أو أمشي بالتراضي.. ده حزء من كلام نجم النادي الأهلي التونسي علي معلول اللي حصل خلاف حاد بينه وبين إدارة القلعة الحمراء بسبب قيده على قائمة الانتظار في الموسم الجديد.. لكن ليه نجم الأهلي قال زيي زي علي معلول؟.. وليه الإدارة خايفة من الفتنة في الفريق؟.. وأيه اللي طلبه معلول وقلق الكابتن محمود الخطيب؟.. ده اللي هنعرفه مع بعض في “قشة لفة بلس”.
أزمة كبيرة في النادي الأهلي سببها نجم نسور قرطاج الدولي علي معلول اللي طلب يلغي بند في عقده عشان يكمل مع الفريق لكن لجنة التخطيط وإدارة الكرة خايفة من اللي هيحصل.
وده اللي كشفه مصدر مقرب من معلول اللي حكى عن آخر تطورات مفاوضات تجديد عقد الظهير الأيسر اللي انتهي مع الفريق.. وبعد ما قعد معلول مع الإدارة واتفقوا على كل تفاصيل العقد الجديد واللي بيشمل مد التعاقد لمدة موسم واحد قابل للزيادة.
وكمان اتفقوا على الراتب اللي هيكون مليون دولار في الموسم.. لكن إدارة الأهلي مقالتش نجم منتخب تونس إنها مش عايزة تقيده في قايمة الفريق عشان مياخدش مكان لاعب أجنبي ويقدروا يقيدوا اللعيبة الاجانب اللي تعاقدوا معاها.
المصدر قال إن النادي الأهلي مبلغش معلول بعدم قيده في قائمة فريق الكرة الأول، وهيأجل القيد لحد شهر يناير الحاي وده اللي أغضب التونسي على معلول بعد ما فوجئ برفع اسمه من القايمة وحس إن الإدارة مش بتقدر مجهوده وتاريخه وتضحياته مع الفريق طول السنين اللي فاتت.
علي معلول تواصل مع أمير توفيق، مدير التعاقدات في الأهلي وطلب ضرورة عقد جلسة جديدة لعدم شعوره بالتقدير من جانب النادي في اتخاذ القرار ده دون الرجوع إليه.
المصدر أكد أن معلول طلب حذف بند نسبة المشاركة في عقده الجديد، أو ياخد راتبه بالكامل يعني المليون دولار مقفولين سواء لعب أو لأ.. خصوصا بعد اتفاق النادي مع الظهير الأيسر يحيى عطية الله اللي هيكون هو الأساسي وعلي معلول هيلاقي صعوبة في المشاركة مع اللاعب الشاب.
معلول قال لأمير توفيق هاخد المرتب اللي اتفقنا عليه بالكامل ولو مش عاجبكم نفسخ العقد بالتراضي ونرجع حبايب وهشوف نادي تاني اتعاقد معاه.
المصدر شدد على أن معلول رفض تماما فكرة التواجد في قائمة الانتظار، خصوصا في ظل عدم إبلاغه بالقرار قبل توقيع العقود بشكل رسمي..
وعشان كدا إدارة القلعة الحمراء هتعقد جلسة مع معلول عشان يتكلموا في أسباب تأجيل قيده في قائمة الفريق.. خصوصا بعد اكتمال قائمة الأجانب وطلب مارسيل كولر المدير الفني ضم لاعب أجنبي آخر في نفس مركزه.
مصدر في الأهلي قال إن مجلس إدارة النادي خايف من الفتنة اللي هتحصل في الفريق لو لجنة الكرة لغت بند المشاركة.. وكل لاعب مصاب هيطلب نفس الطلب.. وده اللي متوقع يحصل من كريم فؤاد اللي هيطلب بنفس المعاملة اللي حصلت مع معلول خصوصا أن اسمه مرفوع من القائمة بعد إجرائه عملية في الرباط الصليبي.
الأهلي هيحسم الموقف النهائي من طلب معلول في الفترة الجاية بعد التشاور ومعرفة مدى قانونية إحتساب المشاركة للاعب التونسي خلال فترة غيابه عن الملاعب.
معلول مصاب قبل نهاية الموسم الماضي وهيقعد فترة طويلة يتعالج فيها هو وكريم فؤاد اللي عمل جراحة الرباط الصليبي وعشان كدا الأهلي رفعهم من القائمة عشان مياخدوش مكان على الفاضي وهيتقيدوا في أول فترة انتقالات جاية.
