أزمات كتيرة واقع فيها حسام حسن المدير الفني لمنتخب مصر من قبل بداية معسكر شهر سبتمبر بدأت بتحدي الأهلي ليه.. وبعدها الزمالك.. ثم غياب وتمرد محمد عبدالمنعم.. وبعد إصابة إمام عاشور وخروجه من المعسكر.. لكن العميد شايف إن الأحداث دي مترتبة.. ومقصود يوقعوه وأنهم تحالفوا ضده ومحدش وقف معاه من اتحاد الكرة.. لكن ليه حسام حسن شايف إن اللي بيحصل ده مؤامرة؟.. وليه قال على لعيبة الأهلي بيتدلعوا؟.. وأيه اللي حصل لإمام عاشور؟.. ده اللي هنعرفه مع بعض في “قشة لفة بلس”.
الكابتن حسام حسن وأخوه إبراهيم استقروا على تحديد يوم 28 أغسطس لبداية معسكر الفراعنة عشان مباراة كاب فري وبوتسوانا في تصفيات أمم أفريقيا 2025.. لكن الأهلي مرضيش يبعت اللعيبة في بداية المعسكر.. وقال إنهم هيكونوا موجودين يوم 1 سبتمبر حسب لوائح الفيفا.. وده اللي حصل فعلا.
وبعد انطلاق المعسكر رفض مدافع الأهلي السابق ونيس الفرنسي محمد عبدالمنعم الانضمام للمنتخب المصري وبعت جواب اعتذار من ناديه على غيابه وقال إنه مش هيقدر يحضر عشان مش جاهز بدنيا ومشغول بإجراءات الانتقال لناديه الجديد.. وده اللي عمل أزمة في المنتخب خصوصا أن اللاعب من الأعمدة الأساسية في الفريق اللي بيعتمد عليها حسام حسن.
وقبل الماتش بيوم واحد منتخب مصر أعلن خروج إمام عاشور من المعسكر بعد إدعاء الإصابة وأنه مش هيقدر يكمل.. ومصدر قال: لاعب الأهلي اشتكى من آلام في الركبة في بداية المران وفضل الجهاز الفني بالتنسيق مع الجهاز الطبي بقيادة الدكتور محمد أبوالعلا إراحة اللاعب وإعفائه من المعسكر حتى لا تتفاقم إصابته.. ورجع اللاعب على ناديه.
وفي أقل من ساعة أعلنت النيابة العامة إحالة اللاعب للمحاكمة في تهمة الاعتداء على فرد أمن أثناء تأدية عمله وحدد جلسة محاكمته في أول شهر أكتوبر يعني بعد ماتش السوبر الأفريقي اللي هيلعب فيه قدام الزمالك والمحدد ليه يوم 28 سبتمبر 2024.
مصادر قالت إن حسام حسن غضبان من اللي بيحصل وشايف إن لعيبة الأهلي بتتدلع في التدريبات وده اللي خلى إمام عاشور يدعي الإصابة ويخرج من المعسكر ويعمل زي حسين الشحات اللي قال إنه مصاب وساب المعسكر وشارك بعدها مباشرة مع النادي الأهلي في بطولة دوري أبطال أفريقيا 2024.
وكمان شايف إن إمام عاشور بيعتمد على قوة الأهلي ومش بيتدرب بشكل كويس وبيفضل الفريق على مصلحة المنتخب عشان الجماهير وأنه لاعب مستهتر.. ومش ناسي ليه اللي حصل في أول مباراة مع منتخب مصر لما اعترض بشدة على تغييره ومرضيش يسلم على إبراهيم حسن مدير المنتخب وهو خارج من الملعب.
وده نفس اللي حصل مع محمد عبدالمنعم اللي شايف إن ممكن ميروحش المنتخب زي اللي حصل قبل كدا مع عمر مرموش اللي قال إنه عمل عملية في أيده وغاب بسببها عن المنتخب.
ومصادر في نادي نيس الفرنسي قالت: “بعد المشاورات بين محمد عبدالمنعم واتحاد الكرة المصري والمدرب حسام حسن حصل على الموافقة بالإذن الاستثنائي لعدم الانضمام لمنتخب بلده”.
إحنا ملناش دخل في قرار اللاعب، لكنه شايف أنه يرغب في الاستعداد بدنيًا ويتأقلم على الأجواء مع ناديه الجديد.. ومحمد عبدالمنعم يضع منتخب مصر من أولوياته، والغياب ده قرار استثنائي بالنسبة ليه.
حسام حسن قرر أنه مش هيستدعي أي أي لاعب جديد بدل من إمام عاشور ومحمد عبدالمنعم.. وهيكتفي باللعيبة الموجودين معاه
وهما: محمد الشناوي والمهدي سليمان ومصطفى شوبير وحمزة علاء، وأحمد حجازي ورامي ربيعة وأحمد رمضان بيكهام وخالد صبحي ومحمد هاني ومحمد حمدي شرف ومحمد شحاتة، وأحمد نبيل كوكا ومحمد النني وحمدي فتحي ومروان عطية وناصر ماهر ومحمود حسن تريزيجيه ومحمد صلاح وأحمد سيد زيزو ومصطفى فتحي وإبراهيم عادل، وعمر مرموش ومصطفى محمد ومحمد الشامي وأسامة فيصل.
