ضحك على الزمالك من تاني.. وعمل عقد فيه بنود غريب.. مفاجأة في شروط صفقة محمد حمدي لاعب إنبي.. إزي أيمن الشريعي بيهدي اللاعب للأهلي؟
محمد حمدي لاعب إنبي راح الزمالك بعد خلافات كتيرة بين أيمن الشريعي رئيس نادي إنبي وإدارة الزمالك.. لكن الصفقة عشان تتم اكتب في العقد بنود غريبة وعجيبة.. وده لأول مرة في شروط العقود اللي بتتكتب في مصر.. ونقدر نقول أيمن الشريعي ضحك على الزمالك تاني بعد عقد زياد كمال اللي راح الزمالك إعارة بشروط غريبة برضو.
لكن أيه هي تفاصيل عقد محمد حمدي مع الزمالك؟.. وأيه الشروط والبنود الجديدة؟.. وليه أصلا الزمالك يوافق على البنود دي؟.. وهيستفاد أيه؟.. واللاعب قدم أيه عشان الزمالك يصر أنه يجيبه؟.. ده اللي هنعرفه مع بعض في “عرب 22”.
محمد حمدي الباك الشمال لانبي اتعرض على جوزيه جوميز مدرب الزمالك وافق عليه، وقال عايزه معايا في الفريق والزمالك اضطر يتعاقد مع 2 لعيبة في مركز الظهير الأيسر بعد أزمة أحمد فتوح اللي هيغيب فترة طويلة ومحدش عارف هتخلص امتي.
لكن قبل الإعلان عن الصفقة أيمن الشريعي رئيس إنبي قال: مفيش مفاوضات بين الزمالك وإنبي على محمد حمدي.. واللاعب مش هيلعب في أي نادي في الدوري المصري.. الأمر منتهي.. وعايزينه يحترف في أوروبا.
بس الكلام ده طلع مش صحيح وكان بيراوغ بيه المسئولين في الزمالك اللي توصلوا بالفعل لاتفاق مع النادي البترولي عشان محمد حمدي يوقع على عقد إعارة لمدة موسم مقابل 3 مليون جنيه.
بس المفاجأة في العقد إضافة بند مع أولوية الشراء ومش مع أحقية الشراء اللي معروف في كل العقود.. وأيمن الشريعي رئيس نادي إنبي عمل مع الزمالك “سوفت وير جديد في سوق انتقالات الدوري المصري”.. وده اللي كان معطل الصفقة.
أيمن الشريعي رفض يبيع اللاعب بعقد نهائي للزمالك، وطلب من الزمالك إعارة محمد حمدي لمدة 6 شهور بس وبعدها وافق على سنة مع وجود بنود في العقد “جديدة ومخيفة” عن الموجودة في عقد زياد كمال.
وفي النهاية تم الاتفاق على رحيل اللاعب لمدة موسم واحد فقط على سبيل الإعارة مع أولوية الشراء وليس مع أحقية الشراء.. أولوية الشراء يعني إنبي مش مجبر يبع اللاعب للزمالك عكس أحقية الشراء اللي بيخلي العقد يتحول بشكل تلقائي للنادي المعار ليه لو عايز اللاعب.. والجماهير شايفة إن العقد ده بيهدي اللاعب للأهلي لو حب يضم زياد في المستقبل وعرض مبلغ أكبر من الزمالك.
لكن مصدر في نادي الزمالك قال فيه “بند مبتكر” موجود في عقد إعارة اللاعب للزمالك، والبند ده بينص على حق الفريق الأبيض في الحصول على نسبة من 5 لـ10% من قيمة بيعه في حالة انتقال محمد حمدي من إنبي لخارج مصر خلال الموسمين اللي بعد نهاية فترة إعارته للقلعة البيضاء.
محمد حمدي لاعب شاب عنده 21 سنة وقدم 59 مباراة بقميص نادي إنبي في جميع المسابقات، وسجل فيهم هدفين وقدم 6 تمريرات حاسمة.. ده يعتبر الصفقة الرابعة بعد الظهير الأيسر المغربي محمد بن تايج اللي جاي من صفوف سانت إيتيان الفرنسي.. والمهاجم الفلسطيني عمر فرج من نادي أيك السويدي والجابوني أرون سالم بوبيندزا في صفقة انتقال حر.
قبل صفقة محمد حمدي فعقد زياد كمال مع الزمالك أثار الجدل عشان البنود اللي فيه واللي بسببها نادي إنبي خد 100 مليون دولار من الزمالك بعد فوزه بالكونفدرالية واللاعب مشاركش في البطولة
اللاعب راح إعارة لمدة موسمين ونص مقابل 30 مليون جنيه.. وإنبي حط بند يحق ليه بيع زياد كمال الزمالك ياخد 10% في السنة الأولى و20% في السنة التانية.. وكمان إنبي ياخد 3 مليون جنيه لو فاز الزمالك بالدوري.. ومليون لو فاز بالكاس.. و5 مليون جنيه لو فاز بالكونفدرالية.
