“سامحوني.. عايز أرجع الأهلي.. وتركي آل الشيخ السبب”.. مفاجأة نجم الأهلي السابق يعرض الصلح على الخطيب.. ويوسط معشوق الجماهير حسام عاشور
“أنا غلطان.. سامحوني وعايز أرجع للنادي من تاني.. الأهلي ده بيتي.. وجمهوره فوق دماغي.. وقعدت في النادي أكتر ما قعدت في بيتي ومع مراتي.. وبقول لأى حد زعل منى أنا أسف.. متزعلش مني يا كابتن خطيب ولأى فرد زعل منى.. أنا أهلاوى وبحب الأهلي.. المستشار تركي آل الشيخ السبب”.. ده جزء من كلام نجم الأهلي اللي حصل خلاف بينه وبين الكابتن محمود الخطيب وعايز يرجع من تاني.. لكن المفاجأة في الواسطة بينه وبين الخطيب.. مين هو؟.. وليه عايز يرجع تاني بعد ما ساب الأهلي؟.. ده اللي هنعرفه مع بعض في ”قشة لفة بلس”.
الفترة اللي دخل فيها المستشار تركي آل الشيخ رئيس هيئة الترفيه السعودية النادي الأهلي وجاب ليهم صفقات وبقي رئيس شرفي للنادي وبعدين اختلف مع الكابتن الخطيب وعمل نادي بيراميدز.. حصل فيها شوية مشاكل بين اللعيبة والإدارة ومشي كام لاعب من أبناء القلعة الحمراء منهم اللي راح بيراميدز واللي اعتزل وراح أندية تانية.
وبطل حكايتنا النهاردة هو الكابتن التاريخي للنادي حسام عاشور اللي اختلف مع الإدارة عشان كان عايز يجدد عقده لمدة سنة ويحقق حلمه لكن المسئولين وقفوا ضده ومنعوه من تحقيق أمنيته في أنه يكون أكتر لاعب في العالم حقق بطولات وعشان كدا طلع هاجم إدارة النادي في أكتر من مرة
لكن بعد كدا ندم وأعلن اعتذاره وقال إنه عايز يرجع النادي من تاني في أكتر من موقف.. لكن المرة دي وسط نجم بتحبه جماهير الأهلي وهو عضو مجلس الإدارة وكابتن الفريق السابق حسام غالي اللي طلب من الخطيب العفو عن اللاعب بعد اعتذاره لكن الخطيب لسه منشف دماغه ورافض.
ومصادر في الأهلي قالت إن الخطيب معندوش مشكلة في وجود اللاعب السابق في الأهلي لكن مفيش مناصب ليه في القلعة الحمراء في الوقت الحالي.. ولا في القناة ومحدش عارف المستقبل فيه أيه.
حسام عاشور قدم اعتذاره للخطيب بسبب الطريقة اللي مشي بيها من الأهلي وقال: “قعدت في النادي الأهلي أكثر من بيتي، قضيت عمري كله في الأهلي والنادي فوق رأسي.. فايلر سبب رحيلي عن الأهلي ومش عارف سبب رفضه لوجودي في الفريق، ومحمود الخطيب قيمة وقامة، وأعتذر له ولأي شخص زعلته داخل الأهلي”.
“لجنة التخطيط عرضت عليا إقامة مباراة اعتزال والحصول على دورات بالخارج والعمل بقناة الاهلي، وكان نفسي اعتزل في النادي، ولو رجع بيا الزمن كنت هعتزل في الأهلي.. جمهور الأهلي هو كل شيء بالنسبة ليا، الحمد لله الكل بيحترمني وهو أفضل شيء حصل ليا في حياتي، والنادي هو اللي عمل اسم حسام عاشور وخلى كل الناس عارفاه”.
“علاقتي بالأهلي مش هتنتهي.. ارتباطي بيه كبير. علاقتي انتهت ببعض المسؤولين لكن الأهلي هيفضل عمره بيتي.. وأكن التقدير والاحترام للمستشار تركي آل الشيخ.. وبشكره للمرة المليون.. وكنت أتمنى اللعب موسمًا واحدًا مع النادي لأكون أكثر لاعبي العالم تتويجًا بالبطولات”.
الكابتن محمود الخطيب اتكلم عن إمكانية عودة حسام عاشور للنادي في المستقبل وقال: “من يخطئ في حق الأهلي لا يمكن أن أقبله، لأن الأهلي أهم مني وعلي الحفاظ على تلك المنظومة.. النادي الأهلي لا يقف على أحد، وبعد توفيق الله الأهلي هو من يصنع النجوم. الأهلي لا يحزن على رحيل أحد، من يحزن هو من يرحل عن الأهلي”.
