“إحنا نجيب الزمالك بالكارت الدهبي.. الأهلي يقول مش هلعب.. ده مش نظام شغل.. وبتضيعوا علينا الملايين”.. ده اللي قاله المسئولين في الشركة المنظمة لبطولة كاس السوبر المصري اللي هيتلعب في الإمارات بمشاركة 4 فرق من مصر.. لكن المفاجأة في الأهلي اللي هدد بالانسحاب من بطولة السوبر وقال عايز زي بيراميدز هما مش أحسن مننا.. ليه الأهلي ظهر العين الحمراء للاتحاد؟.. وليه مش عايز يلعب بطولة السوبر المصري؟.. ومين السبب في الأزمة بين الاتحاد والقلعة الحمراء؟.. وأيه علاقة الزمالك بالأزمة؟.. وليه مش عايزين جوميز يحضر الماتش؟.. ده اللي هنعرفه مع بعض في “عرب 22”.
الاتحاد المصري لكرة القدم عمل نظام جديد لبطولة السوبر المصري عشان يضمن مشاركة الأهلي والزمالك فيه.. وهيكون معاهم بيراميدز بطل كاس مصر وسراميكا كيلوباترا بطل كاس الرابطة.. والزمالك اللي بيشارك بالكارت الذهبي.. لكن الأهلي فاجئ الكل وقال مش هلعب غير لما تحققوا طلباتي وشروطي.
مطالب الأهلي اتكلم عنها مصدر قريب من مجلس الإدارة وقال: “النادي جدد مطالبه من اتحاد الكرة ورابطة الأندية بضرورة النظر في الشكوى اللي قدمها النادي ضد فريق بيراميدز بعد مباراة الفريقين في الدوري خلال لقاء الدور الثاني واللي فاز بيه الأهلي”.
إدارة الأهلي عايزة تعرف مصير التجاوزات اللي قام بيها الفريق السماوي خصوصا اللي عمله الحارس أحمد الشناوي ومروان حمدي اللي شتم جماهير الأهلي ومحمد الشيبي وزلاكا.
مصدر في النادي الأهلي فجر مفاجأة مدوية وقال إن الكابتن محمود الخطيب هدد اتحاد الكرة بعدم مشاركة الفريق في بطولة السوبر المحلي في المواجهات اللي هتتلعب يوم 17 أكتوبر المقبل.
المصدر أكد في تصريحات لموقع ”أهلي نيوز” أن النادي وجه خطاب لاتحاد الكرة ورابطة الأندية هدد فيه بعدم المشاركة في بطولة السوبر المصري.. في ظل عدم إعلان العقوبات الموقعة ضد لاعبي بيراميدز بعد الشكوى اللي قدمها.
الأهلي طالب بمعاقبة أحمد الشناوي، ومحمد الشيبي وزلاكا وممدوح عيد ومروان حمدي، ولحد دلوقتي مصدرش أي قرارات بشأن الأزمة دي.. وتم إرسال خطاب من أجل التهديد بعدم المشاركة في بطولة السوبر المحلي، في حالة عدم إعلان أي عقوبات ضد بيراميدز”.
موقع كورة قال إدارة الأهلي بتدرس الموقف النهائي للمشاركة في بطولة السوبر المصري للأبطال، المقرر إقامتها بالعاصمة الإماراتية أبوظبي في الفترة من 17 لـ21 أكتوبر، ومصدر قال: “ندرس الأمر في ظل الارتباطات العديدة للفريق، بجانب أن هناك بعض الأمور التي نرغب في تحقيقها.. هناك أمور نحتاج إلى تحقيقها مثل زيادة مكافأة الفوز البطولة، خصوصا أن عقد الرعاية لها كبير”.
“عايزين نعرف موعد صدور قرارات لجنة الانضباط بالاتحاد المصري لكرة القدم حول شكاوى كتيرة في أزمة بيراميدز الشهيرة.. واللي قدمنا فيها فيديوهات ومستندات تثبت تجاوز عدد من اللاعبين بحق الأهلي وجماهيره.. ولحد دلوقتي مش مفيش قرارات صدرت في حق جوزيه جوميز مدرب الزمالك، اللي تجاوز في حق أحد الحكام.. وتم إحالة الأمر للجنة الانضباط ليه القرارات دي مش بتطلع”.
الشركة الراعية للبطولة غضبانة من اللي حصل وشايفة إن الأهلي بيحط العقد في المنشار ومفيش مبرر للي بيعمله.. خصوصا أنها هتدفع مبلغ كبير لاتحاد الكرة والأندية المشاركة فيها.. ومش عايزة يحصل أزمة زي اللي حصلت في البطولة اللي فاتت لما اعتذر الزمالك عن المشاركة بسبب تجميد عقوبة لاعب الأهلي محمود كهربا اللي شتم جماهير الزمالك من لجنة الاستئناف.
