“حسين لبيب يتفاوض والخطيب يحسم.. والبركة في صديق كهربا”.. الأهلي يخطف صفقتي الموسم من الزمالك
“ضحك على حسين لبيب وباع اللعيبة للخطيب”.. الأهلي يخطف صفقتي الموسم من الزمالك بقرار عاشق الأهلي
ضحكوا على الكابتن حسين لبيب وخدوا من الزمالك 2 لعيبة شباب سوبر.. وقالوا إحنا مش هنبيع من عندنا حد.. لكن لما الخطيب طلب اللاعيبة وافقوا وقالوا ليه تعال خد اللي عايزه.. ودعموا الأهلي بأهم صفقتين في الموسم اللي اتكلم عليهم الزمالك ورفضوهم.. لكن السبب وراء تفضيل الأهلي على الزمالك.. هو عاشق النادي الأهلي وصديق محمود كهربا.. ليه عمل كدا؟.. ومين هم الصفقتين اللي خطفهم الأهلي؟.. ده اللي هنعرفه مع بعض في “عرب 22”.
المسئولين في الزمالك عايزين يدعموا مركز الدفاع بلاعب سوبر وكل ما يروحوا لفريق في الدوري المصري يلاقوا مغالاة في الطلبات المالية لكن لما وصلوا لاتفاق مع لاعب وإدارة ناديه فوجئوا بمالك النادي رافض يبيع وقال لعيبتي مش للبيع.
والنادي ده هو فريق زد اللي بيملكه رجل الأعمال نجيب ساويرس وبيديره الإعلامي سيف زاهر.. والزمالك اتفاوض معاهم عشان ياخدوا اللاعب محمد إسماعيل مدافع الفريق اللي اتفق مع الكابتن أحمد سليمان على كل تفاصيل العقد.. لكن الإدارة رفضت تبيع اللاعب.
وفوجئنا بعدها بأيام بتوصل المسئولين في الاهلي لاتفاق مع نادي زد للتعاقد مع صفقتين جديدتين في الانتقالات الصيفية الحالية بعد موافقة الأهلي على بيع الثنائي محمد أشرف ورأفت خليل بشكل نهائي.
الصفقة الأولى هي محمد إسماعيل لاعب قلب الدفاع لدعم خط دفاع الاهلي خصوصا بعد إعارة الصاعد أحمد عابدين لفريق سيراميكا كيلوباترا، والصفقة التانية هي عبدالرحمن البانوبي اللي هيدعم مركز الجناح خصوصا انه بيجيد اللعب في اليمين واليسار ونال إعجاب المدرب السويسري مارسيل كولر اللي فضله عن مصطفى زيكو لاعب الفريق.. والصفقتين الجداد هيتم قيدهم في أفريقيا عشان يقدروا يشاركوا مع الفريق في بطولة دوري أبطال أفريقيا.
مصدر في القلعة الحمراء قالت إن النادى الأهلى اعتمد على علاقته الجيدة بالمسؤولين في زد والتعاون المتبادل بين الناديين.. وقدر ياخد ثنائي الفريق مقابل بيع رأفت خليل ومحمد أشرف.
محمد إسماعيل وعبدالرحمن البانونى كانوا قريبين من الانضمام للزمالك في الانتقالات الصيفية الجارية لكن المفاوضات فشلت في اللحظات الأخيرة بسبب تعنت المسئولين في زد.
وده اللي كشفه الإعلامي خالد الغندور اللي اتكلم عن الصفقة وقال: “صفقة انتقال محمد إسماعيل، لصفوف الزمالك فشلت.. ومجلس القلعة البيضاء زعلان من إدارة زد، لأنهم شايفين إنهم كانوا مسهلين موضوع انتقال مصطفى زيكو ومحمد إسماعيل إلى النادي الأهلي”.
“ولما الأهلي صرف النظر عن ضم زيكو اللي مش عاجب كولر.. ومحمد إسماعيل، إدارة الزمالك شافت أن فيه تعنت من نادي زد.. في صفقة محمد إسماعيل، وفجأة رفضوا انتقال اللاعب إلى الزمالك”.
واتقال إن المدير الفني مجدي عبدالعاطي هو اللي رفض رحيل عبدالرحمن البانويي ومحمد إسماعيل، لصفوف الزمالك لكن دي مش الحقيقة.
وده اللي أكده الإعلامي أمير هشام المعروف بتشجيعه للنادي الأهلي وقال إن سبب فشل الصفقة هو رفض نجيب ساويرس وابنه بيع اللاعب لنادي الزمالك.. خصوصا أن أحمد سليمان عضو مجلس إدارة الزمالك توصل لاتفاق مع زد للحصول على خدمات المدافع المتألق لمدة 4 سنوات.
جماهير نادي الزمالك شايفين إن نجيب ساويرس مشجع متعصب للأهلي وصديق شخصي للكابتن محمود الخطيب ومحمود كهربا لاعب الفريق وده اللي خلاه يدفع ليه جزء من غرامته للزمالك هو اللي عطل الصفقة.
وكمان الجماهير هاجمت مجلس الإدارة بسبب ببيع الثنائي ماجد هاني وحمدي علاء نجوم الفريق الشباب واللي كانوا بيلعبوا مع بلدية المحلة وسموحة لنادي زد مقابل 12 مليون جنيه بس.
