“عمل الكشف الطبي.. وركب الطائرة لمصر وحدثت مفاجأة”.. الأهلي ينهي الصفقة الأخيرة جناح سوبر: بيسجل هدف كل مباراة
اللاعب عمل الكشف الطبي وبعت التقرير لمصر.. والمسئولين في الأهلي بعتوا ليه تذاكر السفر عشان ييجي.. لكن حصلت مفاجأة بعد ما ركب الطيارة.. مين هو اللاعب ده؟.. وأيه اللي حصل؟.. وليه الأهلي قال إن صفقة المهاجم الخامس هتتأجل للانتقالات الشتوية؟.. وهيعمل أيه مع اللاعب؟.. ده اللي هنعرفه مع بعض في “قشة لفة بلس”.
النادي الأهلي قبل ماتش السوبر الأفريقي طلع بيان واتكلم فيه عن صفقاته الجديدة وقال إن لجنة التخطيط بالاتفاق مع المدرب السويسري مارسيل كولر أجلوا حسم التعاقد مع الأجنبي الخامس عشان يقيموا احتياجات الفريق الأحمر في الشهور الجاية.
لكن المفاجأة إن الأهلي لسه بيفكر في صفقة الجناح عشان يعوض رحيل أحمد عبدالقادر للدوري القطري واتفق مع الصفقة السوبر وده اللي أكده الناقد الرياضي محمد عراقي.
اللي قال: “فيه خلاف بين لجنة التخطيط وكولر على اللاعب الأجنبي.. والأهلي عارض على كولر بدل اللاعب 10 نجوم سوبر منهم لاعب في بيلعب في الدوري الصيني اسمه ديابياس أوسو هولندي الجنسية.
واللاعب اتفق على كل حاجة مع أمير توفيق مدير التعاقدات في الأهلي مرتبه وكل امتيازاته المالية ومع ناديه.. والعقود اتبعت ليه في الصين وعمل الكشف الطبي وبعت التقرير للمسئولين في الأهلي.. وهما بعتوا ليه تذاكر الطيران.. لكن المدرب السويسري مارسيل كولر رجعه من الطيارة.. وهنا الصفقة تعطلت شوية”.
عراقي قال: “الأهلي بيجهز الصفقات لمونديال الأندية اللي عايز يعمل فيه حاجة بدل الميدالية البرونزية اللي بياخدها كل ما بيروح وعشان كدا بيدور على لعيبة سوبر.. والصفقة ممكن تتأجل للشتاء.. لكن فيه نسبة 5% إنها تحصل رغم إن الأهلي أعلن تأجيل الصفقة الخامسة خصوصا أن كولر عايز يدعم مركز الجناح الأيمن بعد رحيل الثنائي محمد الضاوي كريستو وأحمد عبد القادر.
لكن لو هنتكلم على اللاعب فهو صفقة سوبر لو تمت للأهلي خصوصا أن اللاعب صغير في السن وعنده 24 سنة بس.. ولعب في دوريات كبيرة.. وقيمته التسويقية بتوصل لـ1.2 مليون يورو لكنه مرتبط بعقد مع ناديه الصيني لحد 2025.
الجناح المعروض على الأهلي من أصول أفريقية وتحديدا من دولة عينيا وسبق ليه اللعب مع فريق أياكس وتفينتي، وفي الموسم ده شارك مع ناديه الصيني في 25 مباراة بمختلف المسابقات سجل 9 أهداف وصنع 2 آخرين.. وبيلعب في كل مركز خط الهجوم سواء رأس حربة صريح أو في مركزي الجناح الأيمن والأيسر.
الإعلامي أحمد شوبير قال في تصريحاته على “أون سبورت اف ام”: “قائمة أجانب النادي الاهلي مكتملة وبالفعل لا يحتاج الفريق إلى صفقات جديدة في الوقت الحالي خصوصا أن علي معلول النجم التونسي سوف يعود في الفترة المقبلة”.
علي معلول من الصعب التضحية به في الفترة المقبلة في ظل امكانياته الفنية المميزة، وده اللي دفع القلعة الحمراء لتأجيل فكرة ضم لاعب أجنبي جديد في ظل تواجد رضا سليم وبيرسي تاو وأشرف داري ويحيى عطية الله.
النادي الأهلي جهز قائمة فريقه بشكل كامل وتعاقد مع صفقات سوبر عشان يعوض اللعيبة اللي مشيوا زي محمد عبدالمنعم اللي راح فرنسا وأليو ديانج اللي راح السعودية وأحمد عبدالقادر اللي بيحترف في الدوري القطري.
وتعاقد بشكل رسمي مع المدافع القطري صاحب الأصول المصرية يوسف أيمن، قادمًا من صفوف الدحيل القطري، والمغربي يحيى عطية الله، قادما من صفوف سوتشي الروسي، لمدة موسم على سبيل الإعارة، بالإضافة إلى مواطنه أشرف داري لمدة 4 سنوات، قادمًا من نادي بريست الفرنسي، فضلًا عن عمر الساعي بعقد يمتد لـ5 سنوات، قادما من نادي الإسماعيلي.
