أحمد قندوسي عايز يعمل كوبري ويروح الزمالك.. وكل اللي عمله عشان الأهلي يسيبه يمشي ببلاش من غير فلوس… وراح النادي عشان يحضر التحقيق اللي عمله الكابتن محمد رمضان ورفض يقابل أمير توفيق مدير التعاقدات في الأهلي.. وصمم على كل كلامه.. لكن المفاجأة في ظهور أمير مرتضى منصور وشيكابالا في التحقيقات.. يا ترى ظهور ليه؟.. والقندوسي قال أيه؟.. وأيه حكاية الكوبري اللي عايز يعمله للزمالك؟.. والكابتن الخطيب عمل أيه؟.. ده اللي هنعرفه مع بعض في “عرب 22”.
أحمد قندوسي نجم الأهلي وسيراميكا كيلوباترا عامل أزمة كبيرة في النادي من فترة كبيرة.. واتقال عليه أنه هو السبب في فشل صفقة المغربي زين الدين بلعيد اللي كان جاي الأهلي وبعدين راح بلجيكا.
وطلع في تصريحات على التلفزيون.. وقال إن الوكلاء هما السبب في فشل الصفقات مع الأهلي وده حصل معاه ومع زميله في المنتخب زين الدين بلعيد.. وعشان كدا الكابتن محمد رمضان المدير الرياضي استدعى اللاعب للتحقيقات اللي استمرت أكتر من 4 ساعات في النادي الأهلي.
أحمد قندوسي حضر للنادي الأهلي مع وكيله للخضوع للتحقيق وكان موجود مدير التعاقدات أمير توفيق اللي طلب حضور التحقيقات مع اللاعب.. لكن قندوسي ووكيله رفض وجود مدير التعاقدات في الجلسة.
ونجم الأهلي أصر على التصريحات اللي صدرت منه وعلى صحة اللي قالها في أحد البرامج التليفزيونية.. لكن أكد أنه غلطان وكان لازم يرجع للنادي في البداية قبل ما يتكلم.. وده اللي أكده المدير الرياضي محمد رمضان.. وقاله المفروض كنت تبلغ النادي باللي حصل متطلعش تقول على الهواء.
لكن أحمد قندوسي فاجئ الشئون القانونية وقدم تسجيلات صوتية ومحادثات وأوراق و”شوت سكرين” من واتسات تثبت صحة التصريحات اللي قالها بخصوص صفقته وصفقة زين الدين بلعيد.
وفي التحقيق شارك علي كرماني وكيل اللاعب زين الدين بلعيد على تطبيق “زووم” وأدلى بأقواله في اللي حصل مع لاعبه الجزائري زين الدين بلعيد… وأكد على اللي قاله أحمد قندوسي.. وتواصل مع المدير الرياضي محمد رمضان وحكى ليه تفاصيل المفاوضات اللي قعدت 4 شهور وفشلت.
وفي نهاية التحقق قام وعمل تقرير كامل باللي حصل في الجلسة من أقوال القندوسي ووكيله وأقوال علي كرماني وكيل زين الدين بلعيد.. وقرر يقدم التقرير لرئيس النادي الأهلي الكابتن محمود الخطيب.
لكن المفاجأة فجرها الناقد الرياضي محمد عراقي اللي قال: “الوكيل جعفر النسياني اللي خلص صفقة القندوسي في الأهلي هو هو بشحمه ولحمه كان بيتفاوض مع الزمالك وقعد مع أمير مرتضى منصور وكابتن الفريق محمود عبدالرازق شيكابالا.. قبل حتى ما يتفاوض مع الأهلي ممثل في أمير توفيق.. يبقى إزاي الأهلي بيفرض وكيل معين.
وكل الحكاية أن القندوسي اختلف مع النسياني ورافعين على بعض قضايا واللاعب راح تعاقد مع شركة مصرية تحت السلم هي اللي مسوحاه بالشكل ده وبتحرضه أنه يمشي فري عشان يروح الزمالك.. وعشان كدا طالع يكدب وبيحاول يفسد العلاقة مع الأهلي على أمل انهم يسبوه ويمشي مجانا ويروح الزمالك.. عايز أقولك لما تشوف حلمة ودنك.
مصادر في الأهلي قالت إن المسئولين خدوا قرار برحيل قندوسي آخر الموسم بعد الأزمة اللي أثارها.. ولو ثبت الكلام والاتهامات الإدارة هتعاقب الشخص اللي اتسبب في الأزمة دي.. وأمير توفيق هيكون مستقبله برة النادي بعد فشله في الصفقات اللي كان طالبها كولر.
