المسئولين في الأهلي كانوا مرتبين جلسة تجمع الكابتن محمود الخطيب مع السويسري مارسيل كولر عشان يناقشوا وضع فريق الكرة ويشوفوا موضوع الصفقات الجديدة.. لكن كولر فاجئ الخطيب بسؤال مستفز وغريب شوية.. أيه هو السؤال؟.. وأيه موقف الصفقات الجديدة؟.. ومين هيمشي من القلعة الحمراء في الصيف؟.. ده اللي هنعرفه مع بعض في “قشة لفة بلس”.
الأهلي بيعيد ترتيب الأوراق في فريق الكورة بعد بطولة دوري أبطال أفريقيا اللي فاز بيها الفريق للمرة الـ12 في تاريخه على حساب الترجي التونسي.
ومن ضمن ترتيب البيت من الداخل الكابتن محمود الخطيب رئيس النادي والمشرف على الفريق الأول لكرة القدم طلب يقعد مع مارسيل كولر المدير الفني للفريق عشان يعرف بيفكر إزي في المرحلة الجاية.. خصوصا في بطولة الدوري اللي الأهلي بينافس على لقبها والجماهير عايزة تحقق اللقب.
اتحدد يوم الاجتماع وفي أول الجلسة وقبل ما حد يتكلم.. كولر فاجئ الخطيب واللي حاضرين الاجتماع بسؤال غريب جدا.. وقالهم: هو أيه طموح الأهلي الفترة الجاية.. أنا عايز اعرف طموحاتكم أيه بالنسبه للفريق؟.
وبتفكروا إزي في المستقبل؟.. إحنا داخلين بطولات صعبة.. وعايزين نغير جلد الفريق.. وعشان الأهلي يقدر ينافس على بطولة الإنتركونتيننتال في شهر 12.. ويظهر بشكل كويس في كاس العالم 2025 مع الفرق الكتيرة اللي هتكون موجودة في أمريكا.. لازم نعمل تغيير شامل في الفريق.
كولر كمل كلامه وقال أنا محتاج مش أقل من 8 صفقات سوبر حتى لو الفريق اللي معايا هو اللي لسه واخد بطولة دوري أبطال أفريقيا.. ومتسيد القارة كلها.
لجنة التخطيط والكابتن محمود الخطيب فوجئوا من الكلام ده.. وقالوا ليه إحنا عايزين نعمل حاجة في البطولات العالمية اللي هنشارك فيها عشان العائد المادي بتاعها.. والهدف مش مجرد المشاركة في البطولة.
ورغم سؤال كولر اللي قاعد في الأهلي وعارف إزي بيفكروا.. لكن الكلام ده طمن الكابتن محمود الخطيب إن الرجل مكمل مع الفريق ومش عايز يمشي خصوصا بعد العروض المغرية اللي وصلت ليه من السعودية وقطر والإمارات.
يعني كولر عايز يكمل بس بطموحات عالية.. وده بيتوافق مع تخطيط الخطيب اللي بيجهزه للفريق في كاس العالم 2025
الكابتن محمود الخطيب قالوا عايزين الفرقة تعمل أحسن حاجة في بطولة الانتركونتننتال وكمان كأس العالم للأندية بشكله الجديد.
كولر قال إحنا محتاجين نغير جلد الفريق وعايزين 8 صفقات جديدة أقل حاجة لكن لجنة التخطيط اللي كان حاضر فيها الكابتن حسام غالي وزكريا ناصف ومحسن صالح.. وناقشوا كولر في الصفقات وهو قدم ملف كامل عن كل لاعب في الفريق الإيجابيات والسلبيات.
وبخصوص ملف الصفقات فيه اسمين بالتحديد اتكلموا عنهم أول اسم هو البوركيني محمد كوناتي اللي عايز يجيبه لكن إدارة التخطيط رفضت وقالوا لجنة الاسكاوتينج عملت تقييم للاعب وشايفين أنه مش مناسب للأهلي وهيبقي زي أنتوني موديست المهاجم الفرنسي ومش هيقدم أي إضافة للفريق.
واتكلموا على صفقة زين الدين بلعيد اللي أشاد بيه كولر وقال إنه هيكون إضافة كبيرة للفريق في خط الدفاع.
وده الأهلي قدر يحسم صفقته مقابل 750 ألف يورو، وحسب صحيفة «الخبر» الجزائرية اللي أكدت أن الاتفاق تم بين اللاعب ونادي القرن على توقيع عقد ضمه للفريق لمدة 4 مواسم مع راتب سنوي يعدي الـ نصف مليون يورو في موسم الأول وهترتفع بعد كده.
كمان كولر قدم قايمة باللعيبة اللي مش عايزها ومنهم محمود عبدالمنعم كهربا وطاهر محمد طاهر والجناح التونسي محمد الضاوي كريستو والمدافع محمود متولي وخالد عبدالفتاح وكريم الدبيس.
