هي دي متعة الايجبشن ليج.. الماتشات مش بتخلى من الفضايح والأزمات.. ومفيش مباراة بتعدي كدا من ما يحصل فيها أزمة أو مشكلة.. سواء مع حكم أو لعيبة ولا حتى الجمهور.. لكن بنشوف في مباريات الزمالك عجب العجاب.. ليه ده بيحصل؟.. وأيه الفضيحة اللي حصلت في ماتش الزمالك وكان بطلها الكابتن عبدالله السعيد؟.. وإزي المسئولين في الزمالك ردوا على المشكلة دي؟.. وليه عامر حسين قال الزمالك معاه حق.. وهنغير اللايحة؟.. ده اللي هنعرفه مع بعض يلا بينا نشوف تفاصيل الحكاية.
المشكلة الجديدة كشفها الإعلامي إبراهيم فايق اللي طلع في لايف وحكى عن تفاصيلها وإزي مراقب مباراة الزمالك وفاركو عمل لقطة مع عبدالله السعيد في موقف يعتبر فضيحة لاتحاد الكرة ورابطة الأندية المحترفة اللي بتدير بطولة الدوري المصري.
الأزمة بدأت قبل ما تخلص مباراة الزمالك وفاركو في الجولة 12 والمؤجلة من الدور الأول من الدوري المصري وتحديدا في الدقيقة 85 من زمن الماتش.. الزمالك عرف إن عبدالله السعيد هو رجل المباراة.. وده ظهر لما مراقب المباراة نده على أحمد مجدي مدرب الزمالك وقاله تعالى لما أقولك بيني وبينك عبدالله هياخد رجل المباراة النهاردة.
فالكابتن أحمد مجدي قاله تمام.. وبعد المباراة ما خلصت المراقب راح لعبدالله وهو خارج من الملعب وقاله أنا السبب ها.. فنجم نادي الزمالك رد عليه وقاله طيب يا عم متشكرين.
عبدالله السعيد خد لقب رجل مباراة الزمالك وفاركو. بعد ما سجل جول وصنع الهدف التاني.. وبعدها طلع جمال سالم، مراقب المباراة وفجر مفاجأة عن اللي حصل وقال في تصريحات لقناة نادي الزمالك: “عامر حسين، رئيس لجنة المسابقات، هو صاحب قرار اختيار رجل المباراة.. وبنتواصل معاه قبل نهاية كل مباراة بـ5 دقائق عشان يقولنا مين صاحب الجائزة”.
وقبل نهاية المباراة كان الزمالك هيعمل تبديل.. سألت أحمد مجدي، المدرب المساعد للزمالك، عن اللاعب اللي هيخرخ فقالي: زياد كمال.. وفي الوقت ده كان بينافس عبدالله السعيد على الجائزة.. وتواصلت مع عامر حسين، وقالي اتكل على الله واختار عبدالله السعيد رجل المباراة.
وفيه لجنة متخصصة شغالة مع الحاج عامر هي اللي بتختار اللاعب اللي بيقدم الإضافة لفريقه.. والتواصل بيني وبينه بيكون بشكل مباشر.. وأنا معرفش أفراد اللجنة دي أو عددها
واتكلم عن كتابة تقارير المباريات قال إنه دوره مراقب بيكتب اللي بيحصل في الماتش ويعرضه على عامر حسين رئيس لجنة المسابقات اللي بيقوم بتعديل بعض النقاط قبل كتابة التقرير النهائي اللي بيعتمد في رابطة الأندية واتحاد الكرة.
دي مش أول أزمة تحصل بسبب جائزة رجل المباراة وخصوصا في الزمالك.. قبلها بأيام حصلت نفس المشكلة في ماتش الزمالك وسيراميكا كليوباترا.
بعد المباراة فوجئت الجماهير باختيار أحمد رمضان بيكهام لاعب سيراميكا رجل المباراة عشان جاب جول فريقه اللي خسر المباراة قدام الزمالك وتجاهلوا عبدالله السعيد اللي كان فعلا يستاهل لقب رجل المباراة.
أحمد سليمان عضو مجلس إدارة نادي الزمالك بعد المباراة انتقد طريقة الاختيار وقال: فيه سوء نية من رابطة الأندية ضد الزمالك.. عبدالله السعيد وبعده محمد شحاته هما افضل اللاعبين في مباراة سيراميكا.
عامر حسين رئيس لجنة المسابقات رد وقال: استحاله يكون فيه سوء نيه، ولو كان القرار تأخر كان تم اختيار عبدالله السعيد..هو اللي يستاهل.
ونفس الأزمة اتكلم عليها لاعب الأهلي محمد مجدي أفشة اللي قال واختيار رجل المباراة في الدوري كارثة.. هم بيختاروا اللي بيعمل حركات تعجب الجماهير. زي اللي حصل في كاس مصر واختاروا إمام عاشور رغم أني أحسن لاعب في المباراة.
