الزمالك بيدور على لعيبة جامدة عشان يعمل فريق يقدر ينافس على البطولات في الموسم الجاي خصوصا أن الأهلي بيجمع كل النجوم السوبر من جوة وبرة مصر.. وعشان كدا وكلاء اللعيبة عرضوا على الكابتن حسين لبيب 3 صفقات مجانية من الأهلي.
لكن اللعيبة فاجئت إدارة الزمالك.. مين هما اللعيبة اللي متاحين قدام الزمالك في الصيف ببلاش؟.. وليه الكابتن محمود الخطيب عنف أمير توفيق مدير التعاقدات؟.. ومين اللاعب اللي وقع للزمالك قبل كدا؟.. ده اللي هنعرفه مع بعض في “قشة لفة بلس”.
أنتوني موديست المهاجم الفرنسي مشي بشكل رسمي من الأهلي بعد سنة واحدة في الفريق.. والنادي طلع بيان وشكر اللاعب وقال إنه كان من اللاعبين الملتزمين بقواعد النادي وتعليمات المدير الفني.. ومتعاون مع زمايله.. لكن غير موديست فيه لعيبة تاني عقودهم خلصت ويقدروا يمضوا لأي فريق ومنهم الزمالك.
وعشان كدا الكابتن محمود الخطيب غضبان جدا من أمير توفيق مدير التعاقدات اللي فشل في الصفقات الجديدة ومعرفش يجيب أي يجيب أي لعيبة بدل اللي هيمشوا.. وكمان بيعاني في التجديد مع اللعيبة اللي عقودها هتخلص.. وبداية من يوم 1 يوليو 2024 من حق اللعيبة يروحوا أي نادي.
ولو النادي الأهلي مجددش عقود اللعيبة دي هيكون من حقهم يوقعوا لأي نادي ببلاش.. وعشان كدا بتحاول إدارة الأهلي تجدد عقود اللعيبة دي وهما علي معلول وعمرو السولية ومحمد هاني.
ولحد دلوقتي إدارة الأهلي عايزة تجدد عقد علي معلول اللي بيعاني من إصابة في وتر أكليس.. ومصادر قالت في الأهلي قالت خدنا قرار بتجديد عقد علي معلول عشان محتاجينه لكن مارسيل كولر المدير الفني للفريق رافض معلول وعايز بديل قوي.
المصادر قالت إن تجديد تعاقد معلول مع الأهلي هيكون لمدة موسم واحد، إضافة لموسم إضافي هيكون بشروط محددة هيتم الاتفاق عليها في المستقبل.. لكن اللي معطل الإعلان عن التجديد هو إصابة اللاعب وكمان التفكير في رفعه من قائمة الفريق لحد فترة الانتقالات الشتوية الجاية.
لكن تجديد عقد عمرو السولية فيه شوية صعوبات خصوصا بسبب طلبات اللاعب اللي عايز فلوس كتير زي إمام عاشور اللي بياخد أعلى راتب في الفريق.. بس المصادر قالت إن الإدارة اتفقت مع نجم خط النص على العقد الجديد وهيوقعه الأسبوع الجاي.. تقديرا لقيمته مع الفريق.
السولية كان وقت للزمالك في سنة 2015 وقت ما كان في الإسماعيلي لكن راح احترف في الخليج ورجع على الأهلي.
النجم التالت هو محمد هاني اللي النادي أعلن تجديد عقده لمدة 3 سنين جاية.. وخلص كل الإجراءات الإدارية والمالية الخاصة بعقده الجديد.. واللاعب قال أنه سعيد باستكمال مشواره مع النادي عشان يحقق المزيد من الانتصارات والبطولات ويسعد الجماهير.
لكن مصادر قالت إن الأهلي حقق شروط محمد هاني اللي كان طالب 30 مليون جنيه في الموسم الواحد لمدة 3 مواسم.
وبكدا إدارة الأهلي قطعت الطريق على الزمالك اللي كان عايز يخطف لعيبة من القلعة الحمراء ويستغل الأزمة في عقودهم عشان يجبوهم ببلاش.
كمان واحد من النجوم اللي عاملين مشاكل هو أحمد عبدالقادر جناح الفريق اللي قعد مع المسئولين عشان يجددوا عقده خصوصا بعد رجوعه للمشاركة في الماتشات بعد ما كان غضبان عليه مارسيل كولر المدير الفني للفريق.
لكن عبدالقادر لما قعد مع المسئولين عشان يمدوا عقده اللي هيخلص الموسم الجاي سنتين.. قالهم هتدوني كام.. رد عليه أمير توفيق هتبقي ضمن الفئة الأولى في الفريق.
الكلام ده معجبش أحمد عبدالقادر اللي قالهم: “فئة أولى مين.. شوفوا إمام عاشور بياخد كام.. وأنا هجدد عقدي زي إمام.. ولا أنا عشان طيب ومش بتخانق تيجوا عليا.. أنا زي زي إمام عاشور”.
