الزمالك يخطط لخطف بديل معلول.. 3 نجوم سوبر على رادار الأهلي لتعويض علي معلول.. محترف مغربي ونجم آسيا ومفاجأة في لاعب مزدوج الجنسية
3 نجوم سوبر على رادار الأهلي لتعويض علي معلول.. محترف مغربي ونجم آسيا ومفاجأة في لاعب مزدوج الجنسية.. ومفاجأة من رئيس الزمالك لـ الخطيب
مارسيل كولر المدير الفني للأهلي قالها للمسئولين بشكل صريح.. علي معلول كبر ومش هينفع معايا السنة الجاية.. وبديله كريم الدبيس محتاج يلعب كتير أوي عشان يبقي الباك الشمال الأساسي في الفريق.. أنا عايز ظهير أيسر سوبر عشان البطولات الكبيرة اللي هنلعب فيها الموسم القادم.. لجنة التخطيط وإدارة الإسكاوتينج جهزوا فايل فيه أسماء 3 لعيبة سوبر ستار.. فيه لعيب هيكون مفاجأة ومش هيكلف خزينة القلعة الحمراء كتير.. مين هو؟.. ومين الأسامي اللي مقترحة على كولر؟.. ده اللي هنعرفه مع بعض في “عرب 22” يلا بينا.
إدارة الكرة في النادي الأهلي برئاسة الكابتن محمود الخطيب عايزة تراضي المدرب السويسري بصفقات كويسة بعد فشل صفقة المدافع الجزائري زين الدين بلعيد اللي رفض ييجي الأهلي.. وعشان كدا أمير توفيق مدير التعاقدات في القلعة الحمراء فتح خطوط اتصال مع نجم بيلعب في آسيا عشان يضمه في الميركاتو الصيفي.
النجم اللي رشحته إدارة الإسكاوتينج هو حازم شحاتة لاعب الريان القطري والظهير الأيسر للفريق.. اللي المسئولين في الأهلي شايفين أنه من اللعيبة المناسبين للعب مع بطل أفريقيا خصوصا أنه مش هيتحسب لاعب أجنبي والأهلي هيقدر يستفيد من ازدواج الجنسية المصرية والقطرية اللي معاه.. وهيتقيد كلاعب محلي.
التفكير في شحاته جه بعد نجاح أمير توفيق في حسم صفقة يوسف أيمن، مدافع الدحيل القطري لمدة موسم على سبيل الإعارة مقابل 250 ألف دولار مع خيار الشراء بـ500 ألف دولار في آخر السنة.
لكن الزمالك مش هيعدي الصفقة للأهلي ومصادر من الفريق القطري قالت: “فيه بعض الوكلاء اتكلموا مع الإدارة ووكلاء شحاتة عشان يشوفوا إمكانية لعبه في الدوري المصري.. ولسه لحد دلوقتي كلها مجرد اقتراحات واستفسارات موصلتش للمستوى الرسمي”.
شحاته مش النجم الوحيد اللي بيفكر فيه الأهلي.. المسئولين في القلعة الحمراء بدأوا مفاوضات رسمية مع لاعب الرجاء المغربي يوسف بلعمري اللي مرشح للانضمام للقلعة الحمراء.
خصوصا أن بلعمري يعتبر الحل الأمثل من وجهة نظر المسؤولين في الأهلي.. لو موصلوش لاتفاق مع يحيى عطية الله.. لكن المشكلة في إدارة الرجاء اللي رافضة التخلي عنه عشان هو واحد من أهم اللعيبة في الفريق.
صحيفة “المنتخب” المغربية قالت إن الرجاء وصله عرضين من الأهلي وفريق قطري عشان ياخدوا بلعمري، لكن الإدارة اعترضت وشايفة أنهم مش هيعرفوا يلاقوا البديل المناسب في الوقت الحالي خصوصا بعد طلب المدير الفني الألماني جوزيف زينبارو.. الاحتفاظ بكل اللعيبة البارزين في الفريق وتعزيز صفوفه بلاعبين جديدة.
بلعمري انضم للرجاء في بداية موسم 2023 – 2024 في صفقة انتقال حر من الفتح الرباطي… وعنده 25 عامًا يعني صغير في السن وده اللي عايزه الأهلي.. وكمان لعب 32 مباراة مع الرجاء سجل فيهم هدفين وصنع 7 أهداف، وقدر يحقق معاهم لقب الدوري المغربي ووصل لنهائي كأس العرش.
بلعمري لعب مع منتخب المغرب في سنة 2022 في مباراة ودية ضد جامايكا، وصنع هدف في الماتش اللي فازوا بيه 3-0.. ويعتبر بديل مناسب لعلي معلول اللي تعرض لإصابة في وتر أكيليس في نهائي دوري أبطال إفريقيا قدام الترجي في شهر مايو الماضي.
اللاعب التالت اللي يعتبر مفاجأة خصوصا أنه بيلعب في الدوري المصري هو محمد أشرف الباك الشمال لفريق زد والمعار من الأهلي.. واللي رشحه وليد صلاح الدين نجم الأهلي السابق عشان يكون بديل علي معلول.. وقال: “كريم الدبيس.. لاعب الأهلي.. لكن محمد أشرف خبراته أعلى.. لو اشتغل بشكل كويس مع زد، هيرجع للنادي الأهلي”.
لكن مارسيل كولر رفض رجوع اللاعب وطالب بصفقة أجنبية سوبر.
