واحد خلص مع الأهلي.. وقال مش هلعب تاني في الزمالك.. والاتنين التانيين هروبوا من النادي ومستحملوش اللي بيحصل معاه.. وقالوا مش هنكمل في الفريق وعايزين فلوسنا ولا هنرفع قضايا على النادي.. مين اللي اللعيبة اللي هربت؟
وأيه علاقة النادي الأهلي؟.. ومين اللي اللاعب اللي خلص مع القلعة الحمراء؟.. وأيه طلب زيزو المفاجئ من الكابتن حسين لبيب؟.. ده اللي هنعرفه مع بعض في “عرب 22”.
الأزمات بتحاصر مجلس إدارة نادي الزمالك من كل ناحية.. ومش بيلحق يفوق من مشكلة ويلاقي نفسه واقع في أزمة جديدة.. وبعد ما قدر يحلوا أزمة القيد ويدفعوا فلوس خالد بوطيب.. جه الدور على اللعيبة اللي موجودة في الفريق الأول واللي شهد هروب 3 لاعبين قبل نهاية الموسم.. وكمان هيرفعوا قضايا على النادي عشان ياخدوا باقي فلوسهم.
أول لاعب هرب من الفريق هو المهاجم اللي اشتراه أمير مرتضى منصور المشرف على فريق الكرة السابق واللي دفع فيه ملايين رغم أنه اللاعب ميسواش 3 جنيه ومعملش أي حاجة مع الفريق.. وديما كان دكة.. أيوه هو المهاجم البنيني سامسون أكينولا.
في فترة التوقف الدولي اللي فاتت سامسون سافر بلاده عشان ينضم للمنتخب ومرجعتش.. ومصدر في الزمالك قال: “اللاعب خد جواز السفر بتاعه عشان جاله استدعاء للمشاركة مع بلاده في تصفيات كأس العالم 2026.. وبعدها وكيله بلغ النادي أنه مش راجع تاني عشان مخدش مستحقاته لمدة 6 أشهر متتالية”.
سامسون قال مش راجع لما الزمالك بلغه في شهر أبريل الماضي أن دي آخر سنة ليه في عقده.. وبعدها مرضيش يكمل الموسم وطالب بفلوسه.
المسئولين في الزمالك تواصلوا مع اللاعب واتفقوا على رجعوه للقاهرة عشان يجدول مستحقاته بدل ما يرفع قضية على النادي.. خصوصا أن اللاعب عنده عرض من الدوري الفنزويلي.
اللاعب التاني اللي هرب من الزمالك هو إبراهيما نداي اللي غايب عن تدريبات بقاله فترة بعد ما بلغوه انه خارج الزمالك في الموسم الجديد.. قالهم عايز باقي فلوسي أنا ليا 550 ألف دولار.. وهروح نادي الترجي التونسي.. ولو مخدتش فلوس هرفع قضية وأخد 750 ألف دولار باقي حقي.
وكيل أعمال اللاعب هيقعد مع المسئولين في الزمالك عشان يتفقوا على صيغة لحل أزمة المستحقات بدل ما يقدم شكوى ضد النادي في الفيفا خصوصا أن اللاعب اللي عنده 26 سنة هيتعاقد مع الترجي وهيبدأ معاهم فترة الإعداد ويسيب الزمالك قبل الدوري المصري ما يخلص.
اللاعب التالت هو واحد من ولاد الزمالك واللي اتربي في النادي ولعب مع الناشئين لكن علاقته بنجم النادي الأهلي إمام عاشور عملت مشاكل ليه في النادي بسبب تصرفاته الطايشة.
وهو ياسين حافظ أخوا مرات إمام عاشور.. اللي راح هو وأبوه النادي وطلبوا من رئيس قطاع الناشئين بدر حامد الاستغناء الخاص بيه.
اللاعب اشتكى من اللي بيحصل ليه في الزمالك وقال: “أنا متاخد بذنب إمام عاشور.. وطلبت الاستغناء للرحيل.. مكنتش عايز اروح النادي عشان عارف اللي هيحصل ليا.. أول أسبوع المعاملة كانت حلوة.. وكانوا بيقولوا ليا أنت قائد الفريق.. وبعد كدا رجعوني اتدرب مع اللعيبة الجديدة في الاختبارات”.
مصادر في الزمالك اتأكدوا من حدوث المفاوضات بين اللاعب والأهلي.. لكن المسئولين في القلعة الحمراء متدخلوش في الأزمة.. ومنتظر اللاعب يخلص نفسه ولو كويس هياخدوه بعد ما ياخدوا رأي كولر.
وكمان زيزو طلب من الكابتن حسين لبيب النظر للعروض الكبيرة المقدمة ليه من السعودية وحسم مصيره.. ولو الزمالك محتاج فلوس عرض أنه يمشي عشان يحل الأزمة المالية للنادي.. أو يرفضوا كل العروض عشان يركز مع الفريق.
