الأهلي هو بابا الشغلانة.. عمل اللي هو عايزه في الدوري المصري خصوصا بعد الفوز على بيراميدز منافسه المباشر ذهابا وإيابا في ماتشين.. لكن اللي المباراة الأخيرة كان الأكشن فيها كتيرة.. خصوصا اللي حصل بعيد عن كاميرات التلفزيون.
تعالوا معانا نعرف الكابتن الخطيب عمل أيه بعد هدف وسام أبو علي؟.. وحصل أيه في الممر؟.. ومحمد الشيبي عمل أيه ضايق الجماهير؟.. ده اللي هنعرفه مع بعض في “عرب 22”.
بعد فوز الأهلي على بيراميدز بهدف الفلسطيني وسام أبو علي يعتبر حسم الدوري بنسبة 99%.. لكن المثير في الماتش هو اللي عملته جماهير الأهلي اللي تعبر هي بطل اللقاء خصوصا بعد التشجيع الجنوني للفريق.. قبل بداية المباراة وده اللي كان أكبر دافع ليهم.
وبعد تسجيل هدف الفوز الجماهير اللي موجودة في مدرجات بيراميدز فجأة بدأت تغني وتهتف للأهلي وقالوا: “جمهوره ده حماه” في لقطة غريبة للغاية.. وحصلت اشتباكات بين المشجعين لكن عناصر الأمن تدخلت سريعا لحل الأزمة.. وده اللي قال عليه أحمد حسام ميدو نجم الزمالك السابق: “مشهد يسبب الخجل لنا، لأن في الفيديو جماهير لابسه قميص بيراميدز وبتشجع الأهلي”.
وكمان بعد الجول الكابتن محمود الخطيب رئيس الأهلي احتفل بقوة بهدف وسام أبو علي.. وكان قاعد على أعصابه طول الماتش.
لكن الأحداث المثيرة حصلت قبل المباراة لما محمد الشيبي مرضيش يسلم على لعيبة الأهلي عشان ميقابلش حسين الشحات.. بسبب الخلاف الكبير بينهم واللي وصل للمحاكم.
وفي لقطة غريبة إمام عاشور وقت السلام بين لعيبة الناديين نادي على حسين الشحات وقاله “متسلمش يا حسين” واللي رد عليه وقاله “هو تقريبا مش هنا”.
ومشى الماتش بشكل كويس لحد الدقيقة 80 لما النجم المغربي محمد الشيبي عمل تاكلينج على حسين الشحات عشان ياخد الكرة لكنه دخل على رجل لاعب الأهلي وقرر الحكم طرد اللاعب المغربي بعد مشادة جديدة مع الشحات لولا تدخل لعيبة الفريقين.
وبعد الطرد جماهير الأهلي هاجمت الشيبي وشتمته واللاعب راح للجماهير ورفع تيشرت مكتوب عليه أول حرف من اسم كل بنت من بناته التلاتة.. وجماهير الأهلي كملت الهجوم على اللاعب واعتدت عليه في الممر قبل الدخول لغرفة خلع الملابس ورموا عليه زجاجات المياه.
وبعد الماتش المدير الفني لفريق بيراميدز الأوكراني يورتشيتش، رفض حضور المؤتمر الصحفي للمباراة عشان فوجئ بالصحفيين اللي موجودين راحوا ياخدوا صور تذكارية مع مارسيل كولر المدير الفني للأهلي وده اللي أغضبه وقال إنه مش هيحضر مؤتمر كل اللي فيه منتمين للأهلي.
وكمان محمد الدماطي عضو مجلس إدارة النادي الأهلي كتب بوست على فيسبوك بيسخر من إدارة ومالك نادي بيراميدز سالم الشامسي وقال: “اخبار اقتصادية اليوم تدعو للتفاؤل، بتراجع الدين الخارجي و زيادة الاستثمارات الاجنبية في اذون الخزانة المصرية.. اتمني ان ماتش انهاردة ميرجعناش خطوة لورا وتستمر الاستثمارات الاجنبية في التزايد”.
وهنا يقصد استثمارات ملاك نادي بيراميدز الإمارتيين اللي كانوا هددوا بسحب استثماراتهم الرياضية من مصر.
وكمان سخر محمد الجارحي، عضو مجلس إدارة الأهلي من فوز فريقه على بيراميدز ونشر صورة مع أعضاء مجلس إدارة القلعة الحمراء وكتب عليها: “ضاعت فلوسك يا هرم”.
