مش هروح الأهلي ولا بيراميدز (صورة لاعب مجهول وجنبه لوجو الزمالك وفي الخلفية الاهلي وبيراميدز)
“مش هروح الأهلي ولا بيراميدز.. وعايز الزمالك”.. نجم الدوري يعرض نفسه على الزمالك: “خلصوني عايز أعمل تاريخ مش عايز فلوس”
“قالها بشكل واضح وصريح.. أنا عايز العب مع الزمالك ومش هروح الأهلي.. مستقبلي في الزمالك.. عايز ألعب واعمل تاريخ واروح منتخب مصر.. أنا عانيت من اللي الدكة في آخر 4 سنين”.. دي تعتبر أمنية ورغبة نجم الدوري المصري اللي اتكلم عن العروض المقدمة ليه.
لكن لجنة التخطيط في النادي الأهلي عرضته على مارسيل كولر المدير الفني للقلعة الحمراء اللي وافق على ضم اللاعب.. مين اللاعب ده؟.. وليه مش عايز يروح الأهل يولا بيراميدز؟.. ومين اللي هيحسم صفقة انتقاله للزمالك؟.. ده اللي هنعرفه مع بعض في “قشة لفة بلس”.
الأهلي والزمالك دخلوا الميركاتو الصيفي وعملوا صفقات نارية محدش فيهم عاجبه لعيبة من الدوري المصري.. وقالوا اللعيبة الأجانب هي اللي هتصنع الفرق وهتجيب بطولات لكن اللعيبة المحلية كلها زي بعض.. وده رأي المدربين مارسيل كولر في الأهلي وجوزيه جوميز في الزمالك.
لكن فيه عدد قليل من لعيبة الدوري عليهم العين والأهلي والزمالك وبيراميدز عايزينهم خصوصا بعد تألقهم مع أنديتهم.. وده اللي حصل مع النجم اللي بنتكلم عليه في حلقتنا النهاردة وهو مدافع فريق الجونة أحمد حسام اللي اتكلم عن مستقبله هيروح فين الموسم الجاي.. خصوصا بعد مفاوضات الزمالك وبيراميدز ورغبة الأهلي في ضمه.
مدافع الجونة أكد أنه هينضم للفريق اللي يخليه يلعب وفرصته يكون أساسي كبيرة سواء الأهلي أو الزمالك.. وقال: “النادي اللي هعرف ألعب معاه هروح ليه.. أنا عانيت من الجلوس على دكة الاحتياطي 4 سنين ومش هكرر ده تاني.. وأنا سايب جميع الأمور اللي بتحصل خارج الملعب لوكيلي.. وسمعت عن وجود مفاوضات لضمي في يناير الماضي.. لكن العرض مكانش مناسب لفريق الجونة”.
معرفش أي حاجة المفاوضات.. ومقعدتش مع وكيلي لحد دلوقتي ولكن ده هيحصل قريب وهعرف مصيري سواء باستمراري أو رحيلي عن الجونة.. والزمالك نادي كبير جدًا.. وارتباط أي لاعب بيه ييعلي من قيمته.. وشرف ليا الانضمام للزمالك.. وهي دي رغبتي.. أنا عايز ألعب لنادي الزمالك.. بس أي شيء هيحصل هيكون من خلال نادي الجونة.. وأنا واحد من أبناء النادي”.
أحمد حسام كان من ضمن طلبات كولر من بداية الموسم اللي فات خصوصا أن لاعب صغير.. وعنده 22 سنة بس يعني من مواليد 27 أكتوبر 2001 .. وبيلعب في مركز قلب دفاع.. ونال إعجاب قطبي الكرة المصرية الأهلي والزمالك وعمل صراع بين الناديين ودخل في الصفقة جديد نادي بيراميدز اللي عايز يضم اللاعب.
الكابتن علاء عبدالعال مدرب اللاعب اتكلم عنه وقال: “أحمد حسام ظهير عصري وبيقدم كرة جيدة، وحصلت مفاوضات شفوية مع اللاعب ووكيله من جانب الزمالك، وتواصلوا مع مسؤولي نادي الجونة.. والموضوع في يد إدارة الجونة”.
“مركز أحمد حسام نادر جدا في مصر في الوقت الحالي، وشايف أن أحمد حسام من أفضل الظهراء في مصر خلال السنوات المقبلة.. متميز بيلعب برجليه الاتنين.. ويعتبر ظهير تالت عصري… ولازم يتباع بمبلغ محترم.. والزمالك تعاقد مع زياد كمال من إنبي بمبلغ كبير على سبيل الإعارة، وأنا شايف أن أحمد حسام أهم بكتير منه”.
أحمد حسام اتكلم عن اللعيبة في الدوري المصري وقال: “فيه عدة لاعبين مميزين في الدوري المصري.. وعبدالله السعيد رقم 1 في مصر، إبراهيم عادل قدم موسم كويس وبرضو وسام أبو علي ومحمد عبدالمنعم في النادي الأهلي”.
حسام حسن مدرب كبير، والنتائج بتدل على أن اختياره كان صحيح، ويسير بصورة رائعة حتى الآن، وحلم لأي لاعب أن ينضم لمنتخب بلاده، وأتمنى أن ده يحصل في الموسم الجديد.
