أسرع لاعب في مصر.. ومفيش مدافع هيقدر عليه”.. رئيس ناديه رفض الأهلي.. وهيدفع جزء من مرتبه مع الزمالك.. ما لا تعرفه عن صفقة حسين لبيب الخارقة!
سرعته خارقة ومحدش هيقدر يقف قدامه.. ونادي أحد السعودي لما حب يقدمه للجماهير وقت التعاقد معاه في 2023 استعان بمقطع فيديو للشخصية الرئيسية للمسلسل الأمريكي الشهير “THE FLASH”.. في إشارة لسرعته الخارقة اللي بتشبه بطل المسلسل.. يعني إحنا قدام لاعب مهاري وسريع وقادر يعدي أي مدافع خصوصا في الدوري المصري.. والمفاجأة إن رئيس ناديه هيدفع جزء كبير من مرتب اللاعب مع الزمالك.. لكن ليه رفض عرض الأهلي؟.. وأيه مهارات اللاعب؟.. وإزي هيفيد فريق الزمالك؟.. وهل جوميز هيقدر يستغل قدراته الفنية ولا لأ؟.. ده اللي هنعرفه مع بعض في “قشة لفة بلس”.
اللاعب اللي بنتكلم عليه هو الجناح الدولي البولندي كونراد ميشالاك لاعب نادي أحد السعودي وصفقة الزمالك الجديدة اللي هيشارك مع الملكي في بطولة السوبر الأفريقي قدام الأهلي.. وهيكون واحد من أهم أسلحة جوزيه جوميز مدرب الزمالك في الماتش ده.
الزمالك أنهى التعاقد مع النادي واللاعب وتوصلوا لاتفاق على كل الأمول المادية الخاصة بالانتقال ميشالاك للزمالك، ومصدر سعودي اتكلم عن الصفقة وقال: “رئيس نادي أحد صديق شخصي للكابتن حسين لبيب ومشجع زملكاوي.. وعرض على مجلس القلعة البيضاء إعارة اللاعب لمدة سنة مع تحمل جزء من مرتبه مع الزمالك كهدية.. وده اللي رحج كفة اللاعب في الانضمام للدوري المصري”.
وكان فيه خلاف بين أعضاء مجلس الزمالك وجوميز اللي كان عايز يضم الجامبي مودو بارو لاعب أهلي جدة لكن المجلس عايز يخلص مع ميشالاك لأن اللاعب جاهز من الناحية البدنية والفنية وهيقدر يشارك في السوبر الأفريقي.
كونراد عنده 26 سنة ولعب مع نادي أحد 32 مباراة في جميع المسابقات.. سجل 9 أهداف وصنع 3 آخرين مع الفريق السعودي.
ويعتبر لاعب مميز جدا بالعين حتى لو الأرقام مش موضحة ده.. وللزمالك مفيد في أوضاع تكتيكية في “الكونتر اتاك” لسرعته الكبيرة.. ومميز في الواحد على واحد.. وده مش بيأثر على سرعته ودي أهم نقطة عنده.. ومعظم مراوغاته للداخل وبعد المراوغة بيمرر بشكل تلقائي وده شيء كويس خصوصا لو معاه جناح عكسي سريع زي أحمد مصطفى زيزو ومهاجم فينشر زي عمر فرج أو سيف الدين الجزيري.
وكمان اللاعب بيجيد في مراكز الجناح يمين وشمال لكن عيبه الأكتر أنه يمين يعني بديل لزيزو.. بس هو عنده احتكاكات قوية في أكتر من محطه احترافيه كلها في دوريات أقوي من كل الدوريات الإفريقية.
كونراد لاعب جناح لكنه عارف طريق الجول كويس وبيجيد إنهاء الهجمات مش بيكتفي بصناعة الفرص.. ولعبه في الجناحين الأيمن والشمال بيوفر بديل استراتيجي في حالة غياب أحمد سيد زيزو نجم الفريق لأي ظرف.
مصدر في نادي أحد السعودي قال: “كونراد واحد من أفضل الأجانب اللي مروا على النادي.. وكان عنده عرض من أهلي جدة لكنه بالغ في طلباته المالية وده اللي عطل الصفقة”.
المصدر قال: “كان فيه اتصالات شفهية من الأهلي بشأن اللاعب”.
لكن من عيوب اللاعب هي أنه لاعب جناح بيميل للعب على طرف الملعب وبيبعد عن مناطق الخطورة عكس المغربي أشرف بن شرقي اللي كان بياخد الكرة ويروح مباشرة على المرمى وده اللي بيفسر أرقامه الضعيفة مقارنة بسرعته الخارقة.
كونراد ميشالاك لعب 275 مباراة على مدار 10 مواسم في مشواره مع الأندية اللي لعب ليها بداية من موسم 2013 – 2014 وحتى موسم 2024، باستثناء مرحلة الشباب، وسجل 29 هدف، وعمل 32 تمريرة حاسمة وحصل على 14 بطاقة صفراء، ولم يتعرض للطرد.
