الكوفر: تغيير في الجهاز الفني للأهلي (صورة كولر +سيد عبدالحفيظ +سامي قمصان)
تغيير في الجهاز الفني لكولر.. وهذا هو مدير الكرة الجديد! .. 5 قرارات ثورية من الخطيب بعد خسارة السوبر الأفريقي
الفريق بيفك واللعيبة بتسهر برة لوش الفجر.. ومحدش عارف يسيطر عليهم.. والنتيجة ظهرت في ماتش السوبر الأفريقي.. اللي الزمالك قدر ياخده منهم ويفوز بيه رغم أن الأهلي كان متقدم في النتيجة من الشوط الأول.. وعشان كدا الكابتن محمود الخطيب خد قرارات ثورية.. وقرر يرجع مدير الكرة ويوقع غرامات كبيرة جدا على اللعيبة.
وعشان كدا الجماهير منتظرة تعرف مين هو مدير الكرة الجديد؟.. وأيه التغيير اللي هيحصل في الجهاز الفني لكولر؟.. والخطيب هيعمل أيه؟.. ده اللي هنعرفه مع بعض في “قشة لفة بلس”.
حالة من الغضب مسيطرة على إدارة النادي الأهلي وخصوصا الكابتن محمود الخطيب اللي وفر كل حاجة للفريق عشان يكسب لكن اللعيبة استهترت في المباراة ومعملوش اللي عليهم وقللوا من لعيبة الزمالك في الماتش.
وبعد نهاية المباراة لجنة التخطيط عقدت اجتماع عشان تناقش ملف خسارة بطولة السوبر وخصوصا اللي حصل في المباراة.
ومصادر في النادي الأهلي فجرت مفاجأة عن اجتماع لجنة التخطيط مع السويسري مارسيل كولر المدير الفني للفريق وطريقة اللعب قدام الزمالك وأنه محضرش بشكل كويس للمباراة سواء من النواحي النفسية والبدنية، والتغيرات اللي مكانتش في محلها واللاعبين مش جاهزين للمواجهة من البداية.
المصادر قالت: “كولر مستغلش ضعف بعض الخطوط في الزمالك.. وفشل في الضغط من بدري على خط الدفاع ومعرفش يعمل حاجة قدام لعيبة الفارس الأبيض”.
وعشان كدا محمود الخطيب طلب اجتماع طارئ عشان يشوف أسباب الخسارة من الزمالك وليه اللعيبة خرجت عن النص في الماتش وكمان في الفترة اللي فاتت.
المصادر قالت: “فيه أصوات داخل لجنة التخطيط يتزعمها الكابتن مختار مختار رئيس اللجنة وبتضغط على الخطيب عشان يرجع منصب مدير الكرة من جديد خصوصا بعد سهر اللعيبة لوش الفجر.. وكمان إهمال اللعيبة في التدريبات وتركيزهم على الشو والسوشيال ميديا وتركيزهم على الترند واللقطة”.
لجنة التخطيط شايفة أن سامي قمصان مظلوم في منصب مدير الكرة خصوصا أنه مشغول بالعديد من القرارات الفنية مع كولر.. ومش هيقدر يصدر عقوبات في ظل رغبته في الحفاظ عليهم والحديث معاهم.. وكدا فيه تشتت وتناقض في المناصب”.
اللعيبة من بعد رحيل سيد عبدالحفيظ ومن بعد خالد بيبو وهي مركز على الشو والاستعراض بس.. وقبل ماتش القمة حصلت خناقة بين محمد الشناوي وإمام عاشور اللي كان بيحضر للاحتفال قدام الزمالك مع وسام أبو علي.. ومكنش مركز في التدريبات.
وده اللي خلي لجنة التخطيط عايزة ترجع مدير الكرة عشان يسيطر على اللعيبة. ويرجع الانضباط من تاني.. واستقراوا على تعيين واحد من كباتن النادي القدامي أو رجوع سيد عبدالحفيظ لمنصبه من تاني.
ده غير قرار الخطيب بتوقيع عقوبات كبيرة على اللعيبة بتوصل لـ200 ألف جنيه على كل لاعب.
ومصادر قالت: “الأهلي بيدرس توقيع عقوبات إضافية على بعض اللاعبين، خصوصا رامي ربيعة وعمر كمال عبدالواحد، بسبب الاحتفال اللي عملوا وقت تسديد ركلات الترجيح في مواجهة الزمالك”.
وفيه اتجاه لتوقيع عقوبات إضافية عليهم بسبب التصرفات دي، لكن إدارة الأهلي متنتظرة تقرير من سامي قمصان المدرب العام والقائم بأعمال مدير الكرة، بشأن خسارة اللقب الإفريقي، واللي هيقدمه لرئيس النادي.
وكمان فيه مجموعة آخرى من لعيبة الأهلي، مهددون بتوقيع عقوبات عليهم، بسبب حضورهم لعدد من الاحتفالات والافتتاحات في الأيام اللي سبقت مباراة السوبر الإفريقي دون الحصول على إذن من مدير الكرة بالنادي الأهلي.
لكن إدارة الأهلي واثقة في المدير الفني مارسيل كولر وقالوا مش هنتعامل معاه بالقطعة وهو عمل نجاحات كبيرة وجاب بطولات مهمة للفريق.. لكن استقرت اللجنة على إجراء تغيير في الجهاز المعاون لكولر ورفعوا التوصيات للخطيب المشرف على قطاع كرة القدم بالفريق.
