بعد ما خد إمام عاشور من الزمالك عينه دلوقتي على بديله.. الخطيب مش عايز يسيب أي موهبة في الدوري المصري برة الأهلي.. شاف اللاعب متألق مع القلعة البيضاء وكان ليه دور حاسم في الكونفدرالية.. قالهم هاتوه.. اعرضوا عليه الملبغ اللي يملى عينه عشان ييجي نادي القرن.. لكن المفاجأة في رد اللاعب؟.. قال أيه؟.. ومين هو؟.. والزمالك هيعمل أيه عشان يحافظ عليه؟.. ده اللي هنعرفه مع بعض في “قشة لفة بلس”.
الزمالك لسه بيبني فريق للسنين الجاية وبيدور على اللعيبة اللي تنفع للقلعة البيضاء.. والكابتن حسين لبيب رئيس النادي جاب كام صفقة في الشتاء اللي فات.. ظهر منهم كام واحد هما اللي هينفعوا يكونوا نواة للتشكيل الأساسي في الزمالك.
لكن الأهلي على الناحية التانية منتظر يشوف اللعيبة السوبر عشان يتعاقد معاهم وبيدور على أي ثغرة في العقود عشان ياخد نجم الزمالك زي ما حصل مع إمام عاشور.
النجم اللي بنتكلم عليه هو محمد شحاته لاعب خط النص واللي ظهر بشكل مميزة في بطولة الكونفدرالية رغم أنه كان خارج حسابات جوزيه جوميز في أول الموسم.. لكن بعد كدا قدر يثبت نفسه ويجبر الزمالك على ضمه في نهاية الموسم بشكل نهائي.
أداء محمد شحاته مع الزمالك خلى الكابتن حسين لبيب رئيس الزمالك قال عنه ده أحسن من إمام عاشور 100 مرة.. وكمان شيكابالا قال أنه هيبقى نجم مصر الأول بس اصبروا عليه شوية.
الزمالك واحد من اللعيبة الجدد اللي اتعاقدت معاهم القلعة البيضاء في الميركاتو الشتوي اللي فات على سبيل الإعاره من طلائع الجيش والمسئولين في الزمالك حطوا بند تفعيل الشراء لو اللاعب تألق وعجب المدير الفني وده اللي حصل.
في الأيام اللي فاتت وكيل محمد شحاته عرض على الأهلي اللاعب عشان يتعاقدوا معاه وعايز ياخد فلوس أكتر من الزمالك.. والمفاجأة لقى استجابة من المسئولين في القلعة الحمراء وأنهم عايزين اللاعب.
الأهلي عرض عليه أضعاف اللي بياخده من الزمالك وقاله هيبقي زي إمام عاشور وهيكون ضمن فئة العقود الأولى في الفريق.. وكمان أغرى المسئولين في طلائع الجيش بمبلغ كبير بدل اللي هياخدوه من الزمالك بعد تفعيل عقد الشراء.
وكيل اللاعب قاله إن الأهلي وطلائع الجيش موافقين مش باقي غير موافقتك أنت ونحول ملفك من الزمالك للأهلي .. لكن اللاعب رفض وقال إانسى اللي في دماغك أنا مش رايح الأهلي وحلم عمري اللعب في الزمالك واتحقق.
محمد شحاته قال: “اللعب لنادي الزمالك كان حلم حياتي من وقت ما بدأت لعب كرة القدم.. وأسعد يوم في حياتي يوم ما لبست قميص النادي.. وأبويا مكنش مصدق أني هلعب في الزمالك لما قولت ليه حايلي عرض من الزمالك.
شرف لأى لاعب لبس قميص الزمالك، ورفضت عرض عربي كبير عشان أحقق حلمي.. ولحظة تقديمي لاعبًا في نادي الزمالك كان أسعد يوم في حياتي وما كنتش مصدق نفسي، وشعور كبير جدا أني لاعب فى الزمالك وألبس تيشيرت الفريق الأبيض.
دلوقتي كل تركيزى فى الملعب وهدفى المشاركة مع الزمالك باستمرار.. والتمرين هو اللى بيخلى الواحد يلعب وأنا بموت نفسى ومركز جدًا فى التمرين.
إدارة الزمالك قررت تفعيل بند الشراء في عقد شحاته وتواصلت مع إدارة طلائع الجيش عشان تفعيل البند، بعد ظهوره بمستوى جيد مع الزمالك فى الفترات الأخيرة.
وكمان الكابتن حسين لبيب قرر تعديل عقد اللاعب مالياً بعد تفعيل بند الشراء عشان اللي بيقدمه.. وهياخد 4 مليون جنيه في السنة بدل 2 مليون.
