والله العظيم أنا أهلاوي ومعايا عضوية عاملة في النادي.. ومش بشجع الزمالك.. واللي عايز يشتكي يروح لمحافظة الشرقية باعتبار إنى شرقاوي.. ده اللي قاله اللواء ثروت سويلم لما الزمالك أعلن أنه مش هيلعب مباراة القمة قدام الأهلي.
لكن إزي هيخلي الزمالك يلعب في الدرجة الرابعة؟.. وليه قال الزمالك مش بينافس على البطولات؟.. وملعبش قد الأهلي؟.. وإزي صدم الكابتن حسين لبيب رئيس الزمالك؟.. ده اللي هنعرفه مع بعض.
اللواء ثروت سويلم عضو رابطة الأندية المحترفة، طلع رد على الزمالك بعد إعلانه أنه مش هيلعب أي مباريات قبل لعب كل الفرق مباريات الدور الأول، وقال: “الدوري ليه نظام وإدارة محترمة مكلفة بتنظيمه ومسمعناش عن نادي يقول إنه مش هيلعب إلا بعد انتهاء المؤجلات”.
هي المؤجلات كانت مجاملة للنادي الأهلي؟.. لا.. الأهلي زي مصر في البطولات الخارجية وطبيعي يتأجيل ليه مباريات.. طلب الزمالك غريب جدا.. هل فيه وقت متاح لإنهاء جدول المباريات عشان نتكلم عن الخلل ده.
من المسموح أن يكون للنادي مطالب مشروعة، والزمالك اتأجل ليه مباريات.. بس هو مش زي النادي الأهلي اللي بيشارك في بطولات كتيرة.. وكل واحد يتكلم زي ما هو عايز.. ومفيش حاجة اسمها الزمالك يصر على موقفه.. فيه نظام ولايحة بتحكمنا.. وكل الأندية عارفة الشروط دي ومفيش مجاملات لأي نادي.
وبعد التصريحات دي طلعت رابطة الأندية اعتذرت للزمالك على اللي قاله سويلم وهو كمان قال أنا كنت في الحج ومكنتش جاهز للتصريحات دي.. والمفروض مكنش أقولها.
لكن لما الزمالك أصر على موقفه ومرضيش يلعب ماتش القمة طلع اتكلم تاني وقال: “هيتخصم 3 نقاط نادي الزمالك إذا قرروا الانسحاب.. و3 تاني في آخر الموسم وفقا للايحة.. مفيش فريق يرفض خوض مباراة معينة.. وعامر حسين رئيس لجنة المسابقات مش بيحط الجدول من دماغه”.
ورد على كلام أحمد سالم المتحدث باسم الزمالك أنه النادي هيقدم شكوى فيه وقال: “ممكن يشتكوني لمحافظة الشرقية باعتباري شرقاوي، ويشتكوني لمجلس النواب باعتباري إننا عضو في المجلس”.
مباراة القمة معلنة من شهرين والمباراة هتتلعب في موعدها.. ولو الزمالك مجاش هنحسب النتيجة 2-0 للأهلي، وهيتخصم منه 6 نقاط إحنا مش بنجامل”.
الزمالك مش عايز حد مننا يتكلم.. ولو سكتنا بيقولوا ردوا.. وعند الرد وتبرير الموقف ميعجبهمش الكلام.. بس هل الزمالك افتكر دلوقتي يطالب بالأمر ده بعد شهرين؟.. والزمالك ليه 7 مؤجلات والأهلي ليه 9 مؤجلات رغم أنه بيشارك في بطولات أكثر”.
لو تكرر انسحاب الزمالك من مباريات الدوري هنطبق اللائحة المعلن عنها عند كل الأندية.. واللائحة بتقول هينزل للدرجة الرابعة وده اللي هيحصل.
ثروت سويلم كان قال قبل كدا في رده على اتهامات جماهير الأهلي بمحاباة الزمالك وأكد أنه بينحاز لصالح الأندية الشعبية.. وقال: “أنا أهلاوي والله.. وعضو عامل كمان في النادي.. جماهير الأهلي كونوا انطباع أني زملكاوي لأني تعاملت كتير مع مرتضى منصور رئيس نادي الزمالك السابق بحكم أنه كان زميلي في مجلس النواب.
أنا ديما بعمل اللي شايفه صح.. وحتى لو قررت الانحياز في أي يوم مش هيكون ضد الأندية الجماهيرية.. الأهلي طول عمره نادي المبادئ والقيم.. وأنا أهلاوي.
نادي الزمالك طلع بيان وأعلن رفض لعب أي مباراة في الدور التاني إلا بعد لعب الفرق كل مباريات الدور الأول.. ومنها ماتش القمة قدام الأهلي.. وطالبوا لعب مباريات الدور التاني بالترتيب اللي موجود في القرعة.. ورابطة الأندية اجتمعت مع الكابتن حسين لبيب وفشله في إقناعه بالرجوع عن قراره.
