هنغلب الأهلي ونقدر نفوز عليه بكل سهولة.. بس محتاجين نلعب بشوية رجولة.. الدوري ده بتاعنا وبينادي علينا.. هم مش أحسن مننا
هذا ما قاله رمضان صبحي نجم بيراميدز بعد ما طلع قرار رفع الإيقاف عنه بسبب أزمة المنشطات اللي عملت ليه مشكلة ومنعه من اللعب مع بيراميدز في أهم ماتشات في الدوري المحلي.
لكن العفيجي اتكلم مع زمايله قبل ماتش الأهلي.. قالهم أيه؟.. وأيه اللي حصل في أوضة اللبس في بيراميدز بعد قرار رفع الإيقاف؟.. وإزي بيراميدز هيغلب الأهلي؟.. ده اللي هنعرفه مع بعض في “عرب 22”.
زي ما وقفوا رمضان بدون أي مقدمات فجأة كدا رجعوا ورفعوا عنه العقوبة.. وده بعد وصول خطاب رسمي من لجنة المنشطات المصرية لاتحاد الكرة بينص على رفع عقوبة الإيقاف الإجباري.
لجنة المنشطات استقرت على رفع العقوبة عن نجم بيراميدز بعد خضوعه لجلستين استماع في اللي نسب ليه من وجود تلاعب فى عينية من التحاليل.
ومصادر قالت: “نتيجة العينة التانية اللي اتاخدت بعد 45 دقيقة من العينة الأولى وتم تحليلها في معمل معتمد بإسبانيا أثبتت براءة رمضان صبحي من تعاطي المنشطات.. ومحامي اللاعب قدم 3 حافظات تحتوي على 380 ورقة لإثبات براءته”.
وكمان تقرير ضابط المنشطات أكد أن رمضان صبحي لم يتلاعب في العينة.. وتاريخ اللاعب وعدم تورطه في قضايا مشابهة ساهم في اقتناع لجنة الاستماع بكلام نجم بيراميدز.
رمضان صبحي دخل في حالة نفسية سيئة في الأيام الماضية ومشاركش في التدريبات الخاصة بالفريق وده أثر على اللاعب.. لكن المدير الفني بيجهزه عشان يكون موجود الفترة الجاية ويحسم الماتشات المهمة والحاسمة في بطولة الدوري المصري.
لكن فيه ناس اتهمت مسئولين عن الكرة في مصر بالوقوف وراء أزمة رمضان صبحي عشان تخليص حسابات.. ومصادر قالت إن رمضان صبحي أتظلم ظلم شديد.. وتم اتهامه بالكذب بالتعاطى وإيقافه وتهديد مسيرته وترهيبه بالشطب والإيقاف عشان مشي من النادي الأهلي.
والكلام المتداول على السوشيال ميديا أن الكابتن أحمد شوبير اللي اتوقف من الشركة المتحدة هو السبب في اللي بيحصل لنجم بيراميدز.
وبعد معرفة الخبر رمضان صبحي نشر صورة ليه على حسابه الرسمي بمواقع التواصل الاجتماعي وكتب عليها: “الحمد لله دائمًا وأبدًا”.
واللاعب غاب عن المشاركة مع بيراميدز في آخر 7 مباريات في الدوري المصري.. لكن دلوقتي اللاعب جاهز وهيدخل في حسابات الكرواتي كرونسلاف يورتشيتش المدير الفني لبيراميدز.
ومشاركة رمضان صبحي هتشعل مواجهة الأهلي في بطولة الدوري.. خصوصا أنه واحد من أهم وأخطر العناصر الموجودة في فريق بيراميدز واللي بيلعب أساسي تحت رأس الحربة سواء في مركز الجناح أو صانع الألعاب.. وغيابه أثر على الفريق بشكل كبير.
خصوصا أن اللاعب البديل هو إبراهيم عادل اللي بيشارك مع المنتخب الأولمبي في أولمبياد باريس.. ولكن رجوع رمضان هيعمل تقل في الملعب لبيراميدز وبيرجح كفة الفريق السماوي قدام الأهلي.
ماتش بيراميدز والأهلي في الدوري هيكون حاسم في مشوار البطولة خصوصا بعد ما النادي الأهلي قدر يحسم نتيجة الدور الأول في المباراة اللي اتلعبت على ستاد القاهرة الدولي وفاز الأهلي بنتيجة 3/2 في الماتش اللي تألق فيه حسين الشحات والفلسطيني وسام أبو علي ومحمد مجدي أفشة.
رضا عبدالعال اتكلم عن إيقاف رمضان صبحي وقال إنه موقوف عشان ميلعبش ماتشين الأهلى ولو الايقاف مترفعش عنه بعد ماتش الاهلي الأسبوع الجاى ابقوا سموني رضوى عبدالعال”.
