الصفقة اللي اتقال عليها هتزلزل الوسط الكروي في مصر خلاص خلصت ووقعت للقلعة الحمراء.. والمسئولين في الأهلي أخفوا اللاعب بعيد عن عيون بيراميدز والزمالك عشان المزايدة اللي بيتحصل ويعرفوا يجيبوه.. لكن إدارة الأهلي دفعت مبلغ كبير للنادي السويدي عشان يضموا الصفقة السوبر.
اللاعب اللي بتكلم عنه هو عمر فرج مهاجم منتخب الفدائيين.. نعرف عنه أيه؟.. وأيه حكاية مفاوضاته مع الأهلي في الشتاء؟.. والأهلي هيدفع كام؟.. وسجل كام جول؟.. وأيه أهم مميزاته؟.. ده اللي هنعرفه مع بعض في “عرب 22”.
الصحافة السويدية علقت على خبر مفاوضات الاهلي وعمر فرج وقالت كان ضمن اهتمامات أندية بلجيكية وسويسرية لكنه قرر التوقيع لأكبر نادي إفريقي.. ويعتبر هو ثاني صفقات الأهلي من الدوري السويدي بعد المتألق وهداف الدوري وسام أبو علي.
قبل ما نتكلم على مميزات المهاجم الشاب هنقولكم ليه المسئولين في الأهلي قرروا يكرروا تجربة وسام أبو علي ويستبدلوا اللعيبة المحلية بنجوم من منتخب العزة والكرامة، أول سبب طبعا هو نجاح تجربة وسام وده اللي شجع الإدارة على أنها تتعاقد معاه خصوصا أن اللاعيبة دي متأسسة صح في المدارس الأوروبية يعني بتعرف تلعب كرة حديثة مش زي عندنا في مصر.
عمر فرج من أرض العزة وعنده 22 سنة من مواليد 9 مارس 2022، بيلعب لنادي أيك سالونا السويدي والمسئولين في الأهلي اتفقوا على شراء اللاعب مقابل 23 مليون كرونة يعني أكتر من مليون و880 ألف دولار.. يعني بالمصري قريب من 100 مليون جنيه هياخدها النادي السويدي غير مرتب اللاعب والبنود التعاقدية التانية.
من أهم مميزات عمر فرج أنه لسه صغير وقابل للتطوير وهيكون استمار في المستقبل لو الأهلي حب يبيعه خصوصا أن اللاعب فيه أندية من بلجيكا وسويسرا عايزة تتعاقد معاه.
تعالوا نقولكم أيه ارقام ومميزات عمر فرج، اللاعب طويل وبيعرف يعامل مع الكرات العالية في منطقة الجزاء خصوصا أن طوله بيوصل لـ1,82 متر وبيمتاز باللعب بالقدم اليمني.. وقيمته التسويقية مليون و200 ألف يورو.
صحيفة Expressen السويدية قالت إن المهاجم عمر فرج رفض عروض من بلجيكا وسويسرا وقرر التوقيع مع أكبر نادي في أفريقيا.
عمر فرج لعب 13 مباراة الموسم ده مع ناديه أيك السويدي في الدوري والكأس عمل 5 مساهمات سجل 3 أهداف وصنع تمريرتين حاسمتين.. ومثل منتخب السويد الأول في مباراتين وديتين في يناير 2023.. ولعب مع منتخب السويد تحت 21 عاما في 5 مباريات.. سجل فيهم 4 أهداف سنة 2022.. لكن الاتحاد الفلسطيني لكرة القدم أعلن تمثيل اللاعب لكتيبة الفدائي بناء على رغبته في شهر مايو 2024.
المهاجم الجديد كان من أهم طلبات السويسري مارسيل كولر المدير الفني للأهلي وكان حاطه الاختيار رقم 1 في ترتيب المهاجم المطلوب التعاقد معاهم خصوصا بعد الاستقرار على رحيل محمود عبدالمنعم كهربا.
عمر فرج هيكون المهاجم الأجنبي التاني مع وسام أبو علي اللي تألق مع الأهلي في بطولة الدوري المصري خصوصا أن كل ماتش بيسجل هدف وساهم بشكل كبير في حسم بطولة الدوري المصري للقلعة الحمراء بسبب أجوانه الحاسمة.
وسام أبو علي لعب 16 مباراة بقميص النادي الأهلي في الدوري المصري الممتاز موسم 2023/24.. وأحرز فيهم 14 هدف وقدم 5 تمريرات حاسمة بإجمالي 19 مساهمة من 1119 دقيقة، يعني بيقدم مساهمة بهدف في كل 58 دقيقة.. وده معدل كبير أوي للاعب أول مشاركة ليه في الدوري المصري.
وده اللي خلى جماهير الأهلي تتغنى باللاعب وبتطالب التعاقد مع صفقات تانية زيه خصوصا أن الاهلي مكنش عنده ستايل المهاجمين ده في الفترة الأخيرة وعاني كتير في مركز المهاجم الصريح.
