خناقة في الزمالك على أبناء الأهلي (صورة لعيبة مجهولين الوش بتيشرت الأهلي+ جوميز وحسين لبيب في الخلفية)
“المدرب هيمشي ومش عاجبه الصفقات.. وعايز رمضان صبحي وبن شرقي في السوبر”.. الأهلي يفجر أزمة كبيرة في الزمالك قبل السوبر الأفريقي
“عايز صفقتين من الأهلي.. وبن شرقي ورمضان صبحي يلعبوا في السوبر”.. الأزمات تنفجر في الزمالك قبل مواجهة الأهلي في السوبر الأفريقي
جوزيه جوميز مدرب الزمالك مش عاجباه الصفقات اللي جابها مجلس الإدارة.. والمسئولين في النادي اتفاوضوا مع مدرب المنتخب الأولمبي البرازيلي روجيرو ميكالي عشان يمسك الفريق بعده.. لكن خطوة واحدة هي اللي بتمنع الكابتن حسين لبيب مع إقالة جوميز.. أيه هي الخطوة دي؟.. وأيه علاقة النادي الأهلي؟.. وليه جوميز معترض على الصفقات؟.. وأيه سبب خلاف مجلس الزمالك مع المدرب البرتغالي؟.. وليه قال عندنا أزمات كتيرة برة الملعب؟.. ده اللي هنعرفه مع بعض في “قشة لفة بلس”.
المدير الفني لنادي الزمالك ديما بيشتكي من اللي بيحصل في النادي خصوصا الأزمات الكتيرة اللي حاصرت الفريق ومجلس الإدارة مش عارف يسيطر عليها.. لكن قبل ماتش السوبر الأفريقي اللي هيلعبه ضد الأهلي المشكلات بدأت تظهر للجماهير والإعلام وده اللي كشفه الإعلامي الشهير محمد المحمودي اللي قال: “السبب الحقيقي في الخلاف بين جوميز وإدارة الزمالك هو أن فيه بعض المسؤولين داخل القلعة البيضاء، بيقولوا تصريحات غير حقيقة عنه”.
“تم القول بأن جوميز لم يطلب التعاقد مع مدافع وده مش حقيقي.. لكن جوميز طلب ضم مدافع أكتر من مرة زي محمد إسماعيل مدافع زد وأحمد رمضان بيكهام لاعب الأهلي السابق وسيراميكا كيلو باترا الحالي.. ولكن محدش نفذ طلباته”.
وكمان جوميز وإدارة الزمالك اتفقوا على التعاقد مع رمضان صبحي لاعب بيراميدز والاهلي السابق والنجم أشرف بن شرقي لاعب الريان القطري في الأول.. عشان عايز يضم صفقات بإمكانيات عالية.
جوميز طلب التعاقد مع لاعب في مركز الجناح وبيكون أجنبي وهو لاعب أهلي جدة السابق اللي دربه في السعودية.. لكن إدارة الزمالك تعاقدت مع كونراد ميشالاك لاعب أحد اللي مش مقتنع بيه.. وإدارة الزمالك فشلت في تنفيذ كل طلبات جوميز خصوصا في مركز خط الدفاع.
جوميز قال لإدارة الزمالك: “طالما هتتعاقد مع صفقة.. يبقى تجيب حد أحسن من الموجودين.. مش تجيب لاعب على هواك الشخصي.. وتحسبه عليا صفقة.. ومن هنا ظهر الخلاف بينه وبين مجلس الإدارة”.
كمان جوميز انتقد تسريب الأخبار عن الفريق وقال: “واحدة من أكبر أزمات الزمالك في الفترة الحالية هي تسريب أخبار التعاقدات مع اللاعبين قبل أن تتم رسميًا.. وكمان لازم تكون تدريبات فريق الزمالك مغلقة.. وعلينا أن نحسن استخدام قوة جماهيرنا، ويجب استغلال قناة الزمالك لتقديم الأخبار الرسمية بدل الأخبار المنتشرة في كل مكان على السوشيال ميديا”.
ملف الصفقات الجديدة خلى العلاقة توترت بين جوميز والإدارة برئاسة حسين لبيب اللي كلم الإدارة واعترض على صفقة المغربي محمود بن تايك الظهير الأيسر اللي مش عايز يلاعبه وكان عايز جوناثان نجويم لاعب مودرن سبورت.. وفشلت الصفقة
وكمان رافض صفقة السنغالي سيدي نداي اللي قيده الزمالك تحت السن وعايز يستفيد منه مع الفريق الأول.. ومعاه المهاجم الفلسطيني عمر فرج اللي دعم خط الهجوم.. وكان عايز صفقة سوبر قبل مواجهة الأهلي في كأس السوبر الإفريقي.
مجلس إدارة الكابتن حسين لبيب تعاقد مع 5 صفقات في الميركاتو الصيفي عشان تدعم الفريق في بطولة السوبر الأفريقي قدام الأهلي.. وهما المغربي محمود بنتايك الظهير الأيسر، والفلسطيني عمر فرج المهاجم، ومحمد حمدي لاعب إنبي والباك الشمال والمهاجم السنغالي الشاب سيدي ندياي والجناح البولندي كونراد ميشالاك.
الإعلامي الأهلاوي أمير هشام قال: “المدرب البرتغالي قرر استبعاد بنتايك من قائمة مباراة السوبر الإفريقي، واللاعب لن يشارك أمام الأهلي في هذا اللقاء، واللي هيكون موجود في الجبهة اليسرى هو محمد حمدي”.
